"Junggoda ten jazasi ishlitish omumyüzlik mewjut ehwal"


2006.03.31

B d t ning ten jazasini tekshürüsh boyiche aliy derijilik nazaretchisi manfrid nowak, peyshenbe küni "mejburiy iqrar qildurush asasigha qurulghan" xitay edliye séstimisini tenqid qildi we yerlik emeldarlarning ten jazasi ishlitish ehwali xitayda memliket xaraktérlik mesile bolsimu, lékin jawabkarliqqa tartilmaydighanliqini bildürdi.

Manfrid nowak, peyshenbe küni muxbirlargha xitayda ten jazasining asasiy qatlamlarda siyasiy mehbuslargha qaritilghanliqini eskertip, xitay edliye séstimisining gumandarlarni mejburiy iqrar qildurush asasigha qurulghanliqini tekitlidi. U, " xarlash we ten jazasi bérish sewebi asasliqi yenila kona tüzülmige bérip taqilidu. Jama'et xewpsizlik xadimliri mejburiy iqrar qildurush telipining éghir bésimigha uchrimaqta " deydu.

Nowakning eskertishiche, u xitayning hazirqi edliye séstimisi" gumandarlarning axirqi hésabta jinayitini iqrar qilishigha nahayiti ehmiyet béridighanliqini bayqighan. U yéqinda ötken yili ürümchi, laxasa qatarliq jaylardiki bezi xitay türmiliri üstidin élip barghan tekshürüsh xatirisi boyiche doklat hazirlap, xitayda edliyini musteqil nazaret qilidighan séstima kamliqini otturigha qoydi.

U, doklatta " junggo boyiche ten jazasini emeldin qaldurushtiki eng chong tosalghu nazaret qilish organlirining ajiz ikenliki we edliye séstimisining musteqil emesliki " deydu. Nowakning eskertishiche, u xitayning shinyang shehiridiki "shijyatun yighiwélish lagiri" gha nechche minglighan falun'gung muritlirining qamalghanliqi we bezilirining öltürülgenliki heqqidiki uchurni tekshürmekte iken.

Yéqinda falun'gong teriqiti "shijyatun yighiwélish lagiri" gha 6 ming neper falun'gung muritining qamalghanliqini we bir qisim muritlar öltürülgendin kéyin ichki organliri chiqiriwélinip sétilghanliqini otturigha qoyghan. Lékin xitay tashqiy ishlar ministirliqi buni ret qilghan idi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.