Amérika awam palatasi xitayning kishilik hoquq we pilanliq tughut siyasitini tenqid qildi

Amérika awam palatasining tashqi ishlar komitéti seyshenbe küni guwahliq bérish yighini ötküzüp, xitay kishilik hoquq xatirisi we béyjing hökümitining pilanliq tughut siyasitini tenqid qildi. Amérika tashqi ishlar ministirliqining nopus, musapirlar we köchmenler mesilisi boyiche yardemchi tashqi ishlar ministiri artur deywéy guwahliq bérip, bir perzentlik siyasiti kishilik hoquqqa qilin'ghan qopal ighwagerchilik bolupla qalmay, erler bilen ayallar nopusining tengpungliqini buzmaqta, dep körsetti. U, xitayda mejburi bala chürürüshning yenila omumi yüzlük ehwalliqini eskertip, biraq bu ehwalning yéqindin béri yumshashqa bashlighanliqini tekitligen.

Amérika dölet mejlisi we bush hökümitining qarishiche, b d t nopus fondi jem'iyiti, xitayning pilanliq tughut siyasitini zorluq küch bilen ijra qilishigha yardem bériwatidu. Shunga bush hökümiti b d t nopus fondi jem'iyitge béridighan yardem pulni toxtitip qoyghan. Yardemchi tashqi ishlar ministiri artur deywéy, xitayning pilanliq tughut siyasitini yaxshilash jehettiki tirishchanliqi, amérikining yardemni eslige keltürüshi üchün yiterlik emes, dep körsetken.

Yighin'gha riyasetchilik qilghan awam palata ezasi kristofir simit, "kishini yirgendüridighini, bir perzentlik siyasetning zorluq küch bilen izchil we sistémiliq élip bériliwatqanliqi" dep tekitligen. Amérika tashqi ishlar ministirliqining kishilik hoquq mesililiri boyiche yardemchi tashqi ishlar ministiri maykil kozak, xitay hökümiti térrorchiliqqa qarshi turush urushini bahane qilip, Uyghurlarni shundaqla diniy zatlarni basturiwatqanliqini ilgiri sürgen. (Erkin)