Amérika, xitayda térror tehdidi toghrisida agahlandurdi

Amérika hökümiti, amérika puqralirini xitayning jenubiy rayonidiki kulub, réstoran we mekteplerdiki térror tehditi toghrisida agahlandurdi.

Amérika tashqi ishlar ministirliqi teripidin hongkongdiki amérika konsolxanisining torbitide élan qilin'ghan bir uqturushida, ishenchilik menbelerdin gu'angjudiki amérika hökümet xadimliri shundaqla amérika shirketlirige térrorluq bir tehditi barliqi toghrisida melumat qolgha keltürülgenlikini bildürülgen.

Uqturushta, térrorluq tehditining amérikiliqlar baridighan kulub, réstoran hemde amérikiliqlar ishleydighan orunlar we mekteplerge qaritilghan bolushi mumkinliki tekitlen'gen.

Amérika hökümiti ötken hepte, xitay hökümitining islam esebiy küchliri xitaydiki aliy derijilik mihmanxanilargha hujum qozghishi mumkin dégen melumatigha asasen, xitaydiki amérika puqralirini xitayda térrorluq hujumi toghrisida agahlandurghan. Lékin bir kün kéyin bu uqturushini qayturiwalghan. Amérika xadimlirining éytishiche, xitay emeldarliri térrorluq hujumi toghrisida xewer bergen menbening ishenchlik emeslikini bildürgen.

Roytrés agéntliqining xewer qilishiche, Uyghur musteqilchilirige qarshi basturush herikiti élip bériwatqan xitay hökümiti, öktebir éyida Uyghur aptonom rayonida térrorchiliq pa'aliyiti bilen chétishliq 19 neper chet'el puqrasini qolgha alghanliqini jakarlighan. Emma xelq'ara kishilik hoquq teshkilatliri xitay hökümitining, xelq'ara térrorchiliqqa qarshi urushni bahane qilip, Uyghurlarni basturu'iwatqanliqini bildürmekte. (Qanat)