Amérika elchixanisi térrorluq hujum heqqidiki uqturushini qayturuwaldi

Amérikining béyjingdiki elchixanisi peyshenbe küni islam radikallirining xitayda hujum qozghash éhtimalliqi barliqi heqqidiki uchurning ishenchlik emeslikini bildürüp, bu heqte élan qilghan uqturushini qayturuwaldi.

Amérikining xitaydiki elchixanisining bildürüshiche, xitay saqchi da'iriliri buning aldida, özlirini islam radikallirining kiler hepte xitaydiki aliy méhmanxanilarda térrorluq hujum qozghishi mumkinliki heqqide agahlandurghan. Buning bilen elchixana charshenbe küni tor bétide puqralirini hoshyarliqni östürüsh heqqide uqturush chiqarghan. Uqturushta, " xitay saqchi da'iriliri her qaysi aliy méhmanxanilarni kiler hepte ichide térrorluq hujum yüz bérish éhtimalliqi heqqide agahlandurdi" déyilgen.

Amérika elchixanisi peyshenbe küni élan qilghan bayanatida, xitay saqchi da'irilirining bu xewerning ishenchilik emeslikini bayqighanliqini, amérikiningmu xitayda térrorluq hujum yüz bérish éhtimalliqi heqqide héchqandaq uchurgha ige emeslikini körsetti.

Emma fransiye axbarat agéntliqining xewirige qarighanda, xitay tashqi ishlar ministirliqining bayanatchisi lyu jenchaw, xitay jama'et xewpsizlik da'irilirining héchqachan amérika elchixanisigha we yaki méhmanxanilargha bundaq bir agahlandurush bérip baqmighanliqini bildürgen. U térrorluq tehdit heqqidiki uchurning "bir qisim chet'ellikler teripidin oydurulup chiqirilghanliqi" ni körsetken. (Arzu)