Xitay, amérika konsulxanisigha qaritilghan térrorluq tehdit üstidin tekshürüsh élip bériwatqanliqini bildürdi

Amérikining xitayda turushluq bash elchixanisi gu'angjudiki amérika konsulxanisi we amérika eslihelirining térrorluq tehditke uchrighanliqini élan qilghan kéyin, xitay hökümiti seyshenbe küni bayanat élan qilip, térrorluq tehdit üstidin tekshürüsh élip bériwatqanliqini, chet'ellikler we chet'el eslihelirini qoghdash yolida tedbir alidighanliqini jakarlidi.

Xitay tashqi ishlar ministirliqining seyshenbe küni élan qilghan bayanatida, "amérika terepning uqturushigha diqqet qiliwatimiz. Junggo, junggodiki chet'ellikler we chet'el eslihelirining bixeterlikige dawamliq ehmiyet béridu" dep tekitligen.

Tashqi ishlar ministirliqi, amérika eslihelirige qaritilghan tehditning ishenchlik yaki emeslikini tilgha almidi, emma " biz bezi tedbirlerni alduq shundaqla ularni qoghdash yolida jiddiy tedbirlerni alimiz" deydu.

Amérika hökümiti düshenbe küni jenubiy junggoda yashaydighan amérika puqralirini agahlandurup, gu'angjudiki amérika konsulxanisining amérika eslihelirini nishan qilghan térrorluq tehdit toghrisida "ishenchlik yip uchigha" érishkenlikini élan qilghan.

Béyjingdiki amérika elchixanisining ayal bayanatchisi shéyla paskman, bu qétimqi tehditning ötken qétimqi tehditke qarighanda " pütünley oxshimaydighanliqini" bildürdi.

Xitay saqchiliri ötken hepte amérika elchixanisini esebiy islamchi guruhlarning hujumigha uchraydighanliqi toghrisida agahlandurghan. Emma xitay tashqi ishlar ministirliqi bu uchurni toghra emes, dep élan qilghan. (Erkin)