Xelq'ara saqchi: térrorchilar béyjing olimpik yighinigha hujum qilishni pilanlighan bolushi mumkin


2007.12.14
Share on WhatsApp
Share on WhatsApp

Rusiye "etigenlik" gézitining xewer qilishiche, xelq'ara saqchi teshkilatining bash katipi ronald nobil, aldinqi küni fransiyining li'on shehiride échilghan xelq'ara saqchi teshkilatining yighinda béyjing olimpik musabiqisi térrorluq hujumgha uchrushi mumkin dep agahlandurghan shundaqla hujum qorali bi'o-ximiyilik baktriye bolush éhtimali bar, dep tekitligen.

Xewerde, olimpik musabiqisining yétip kélishige egiship, béyjing da'irilirining bixeterlik mesiliside jiddiylishiwatqanliqini shundaqla li'ondiki yighinda olimpik musabiqisining bi'o-ximiyilik qorallarning hujumigha uchrash éhtimali alahide muzakire qilin'ghanliqini yazdi.

Yighinda xelq'ara saqchi teshkilatidiki ronald nobil," biz hujum éhtimalini ré'alliqtin yiraq emes, dep qaraymiz," dep tekitligen bolsimu, lékin u " hujum qilish éhtimali bar teshkilatning ismini atimighan. En'giliyining "kündilik eynek géziti" bu heqtiki bir xewiride, xitay el-qa'idening hujum nishani bolmisimu, lékin olimpik yighini térrorluq teshkilatlarning hujum nishani ikenlikini bildürdi.

Xitaylarning "dowéy axbarat tori "bolsa xelq'ara saqchi teshkilatining agahlandurushini nahayiti asanla "sherqiy türkistan islam partiyisi"ge baghlidi. Mezkur torning bu heqtiki xewiride "olimpik jeryanida yüz béridighan térrorluq hujum sherqiy türkistan herikitidin kélishi mumkin," deydu. Lékin, yéqinda win'giriyining pich shehiride chaqirilghan xelq'ara "térrorluq heriketler"ge munasiwetlik yighinda gherblik mutexessisler, olimpik musabiqisining hujumgha uchrash xewpi mewjut bolsimu ,lékin sherqiy türkistan teshkilatliri bundaq iqtidargha ige emes, dep qarighan. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.