Teywen xizmet guruppisi, amérika hökümitini teywen'ge qaratqan siyasitini özgertishke chaqirdi

Amérika tashqi ishlar we mudapi'e ministirliki xadimliridin teshkil tapqan, teywen siyasiti xizmet guruppisi, jüme küni amérikining teywen siyasiti heqqide doklat élan qilip, amérika hökümiti, teywen boghuzida künséri jiddiylishiwatqan weziyetni yaxshilash üchün, teywen bilen resmiy munasiwet ornitishi kérek dep, körsetti.

Teywen xizmet guruppisining doklatida, " amérika hökümitining, xitayning siyasiy we herbiy bésimi astida turuwatqan, özining en'eniwiy ittipaqdishi hésablan'ghan teywen'ge sel qarishi, nahayiti jiddiy bir toqunush chiqish xewipini kücheytmekte"déyilgen.

Doklatta tekitlinishiche, xitayning herbiy jehettin künséri küchiyiwatghanlighi shuningdek xitay hökümitining teywenni siyasiy jehettin xelq'ara sehnide yalghuz qaldurush üchün élip bériwatqan pa'aliyetliri, rayonda nahayiti xeterlik bir weziyet yaratqan.

Amérika hökümitining, axirqi bir nechche ay ichide dawamliq teywenni tenqid qilip, xitay hökümitining telipige asasen teywen'ge bésim ishlitip kelgenliki eskertilgen, teywen xizmet guruppisining doklatida, eger amérika hökümiti bu siyasitini özgertmise, amérikining asiyadiki milliy menpe'etining xeterge chüshüp qalidighanliqi, tekitlen'gen.

Teywen xizmet guruppisi doklatida, amérika hökümitini, teywen bilen munasiwetlerde mewjut cheklimilerni emeldin qaldurushqa shuningdek teywen dölet we hökümet rehberlirining amérikini ziyaret qilip, amérikiliq kesipdashliri bilen uchrishishigha ruxset bérishke chaqirghan. (Ömer qanat)