Tayland armiyisi ikki hepte ichide yéngi rehberni saylap chiqmaqchi

Taylandta hökümetke qarshi siyasiy özgirish qozghap herbiy halet élan qilghan tayland armiyisi charshenbe küni téléwiziye istansisini kontrol qilghandin kéyin ikki hepte ichide waqitliq hökümet rehbirini saylap chiqidighanliqini jakarlidi.

Tayland armiyisi générali songti axbarat élan qilish yighinida yene, waqitliq rehberni saylap chiqqandin kéyin 2007 - yili 10- aydin ilgiri saylam ötküzilidighanliqini bildürgen. Uning ipadilishiche, taylanttiki siyasiy dawalghush bir nechche ay dawamlashqan bolsimu, qan tökülmigen halette paytext bankokning herbiy we saqchilar teripidin ötküzüwélin'ghan. U yene " tayland hökümiti ichidiki chiriklik, taylandning siyasiy tüzülmisige buzghunchiliq élip kelgen idi" dep körsetken.

Herbiy qisimlar hazirche hoquqni padishahning bashqurushigha ötküzüp berdi. Axbaratlar padishahning herbiy qisimlarning siyasiy özgirish qozghishigha nisbeten ipade bildürmey sükütte turushi, uning qollighanliqining ipadisi dep tehlil qilmaqta. Nöwette taylandning herbiy, siyasiy, memuriy weziyitini herbiy qisimlar kontrol qilmaqta, bu taylandta 15 yildin buyan herbiy qisimlarning tunji qétim döletni idare qilishi hésablinidu. (Gülchéhre)