تىبەت پائالىيەتچىلىرى ئاتىنادىكى ئولىمپىك تەنتەربىيە يىغىنىنىڭ يەكشەنبە كۈنكى يېپىلىش مۇراسىمىدا تىبەت بايرىقىنى چىقىرىپ ، 2008 - يىلدىكى ئولىمپىك تەنتەربىيە يىغىنىنىڭ ساھىپخان دۆلىتى بولغان خىتاينىڭ كىشىلىك ھوقۇق خاتىرىسىگە نارازىلىق بىلدۈردى.
تىبەتلىك پائالىيەتچىلەر ، تىبەت بايرىقىنى قاتتىق بىخەتەرلىك تەدبىرلىرى ئاستىدىكى ئولىمپىك يىغىنىنىڭ يېپىلىش مۇراسىمى ئۆتكۈزىلگەن تەنتەربىيە سارىيىغا مۇۋاپىقىيەتلىك ئەكىرىپ ، يېپىلىش مۇراسىمى باشلىنىشدىن بىر قانچە مىنۇت بۇرۇن تىبەت بايرىقىنى چىقارغان . بىراق تىبەتلەرنىڭ قولىدىكى بايراق بىلەن تىبەت بايرىقى چۈشۈرىلگەن مايكىلار ئەتراپتىكى ساقچىلار تەرىپىدىن يىغىۋېلىندى .
رويتېرس ئاخبارات ئاگېنتلىقىنىڭ خەۋەر قىلىشىچە ، خەلقارا تىبەت ھەركىتىنىڭ باياناتچىسى تەنزىن سېۋۇ ، بېيجىڭ بىلەن خىتاي تىبەتلەرنىڭ كىشىلىك ھوقۇقىنى دەپسەىدە قىلىپ تۇرۇپ ئولىمپىك يىغىنى ئۆتكۈزىشكە لايىق ئەمەس دەپ كۆرسەتكەن . 2008 - يىلدىكى ئولىمپىك يىغىنى بېيجىڭدا ئۆتكۈزىلىدۇ . بېيجىڭ. ئاتىنادىكى ئولىمپىك يىغىنىنىڭ يېپىلىش مۇراسىمىدا ئولىمپىك بايرىقىنى تاپشۇرىۋالدى . ئولىمپىك يىغىنىنىڭ يېپىلىش مۇراسىمىدىن بىر قانچە كۈن ئىلگىرى چەتەلدىكى ئۇيغۇر تەشكىلاتلار ، خىتاي دىموكراتلىرى تىبەتلەرنىڭ نارازىلىق ھەركىتىگە ئاۋاز قوشىدىغانلىقىنى جاكالىغان . 25 - ئاۋغۇست كۈنى خەلقارا كىشىلىك ھوقۇق كۈزۈتىش تەشكىلاتى بايانات ئېلان قىلىپ ، خىتاي ھۆكۈمىتىنى 2008 - يىلدىكى بېيجىڭ ئولىمپىك يىغىنىغىچە كىشىلىك ھوقۇق ، ئەمگەك ھوقۇقى ۋە مەتبۇات ئەركىنلىكى بويىچە ئىسلاھات ئېلىپ بېرىشقا چاقىرغان ئىدى . (ئەركىن)