Amérika xitayning tibettiki tekshürüsh ömikige qatnishish teklipini tapshuruwaldi

Amérika hökümiti xitay tibetke élip baridighan hökümet tekshürüsh ömikige qatnishishni telep qilip kéliwatqan bolup, fransiye agéntliqida körsitishiche, xitay amérikining mezkur telipige qoshulidighanliqini bildürüp, amérikining xitayda turushluq elchixanisigha ömekke qatnishish teklipi ewetken.

Amérika tashqi ishlar ministirliqi bayanatchisi shan mékormékning bildürüshiche, mezkur ömek tibet we qoshna rayonlarda jüme we shenbe ikki kün turidighan bolup, amérikining xitayda turushluq elchixanisi xitay hökümiti ewetken teklipni qobul qilghan.

Fransiye agéntliqida neqil élinishiche, mékormék buni toghra yönilishke qarap élin'ghan bir qedem dep körsetken hemde, amérika hökümitining, bu qétimliq xitaygha qarshi namayish élip bérilghan lxasa, chingxey, gensu qatarliq rayonlarni we tibet ichidiki kirish pütünley meniy qilin'ghan rayonlarni toluq échiwétish jehette xitaygha bésim ishlitiwatqanliqini bildürgen.

Mékormék yene, amérika hökümitining xitay hökümitini tibette élip bérilghan namayishlargha sewrchan bolushqa we dalay lama bilen ashkara di'alog élip bérishqa dewet qilip kéliwatqanliqini qoshumche qilghan.

Bu ayning 10 - küni tibetning lxasa shehiride bashlan'ghan naraziliq namayishining tesir da'irisi tibetning bezi wilayetliri we tibetler topliship olturaqlashqan qoshna rayon, ölkilergiche kéngiyip, bu awghustta olimpik yighinigha sahibxan bolushni ümid qilip kéliwatqan xitay hökümitini sarasimige sélip qoyghan hemde xitay hökümiti bu namayishlarni qattiq qolluq bilen jiddiy basturghan bolup, netijide xitayning tibet namayishchilar üstidin élip barghan zorawanliq heriketliri dunya jama'etchilikining küchlük naraziliqini qozghighan.

Tibetlerning sürgündiki hökümitining bildürüshiche, xitay hökümiti tibetlik namayishchilar üstidin élip barghan basturush herikiti jeryanida hazirgha kelgüche 140 che adem öltürülgen bolup, emma xitay hökümiti özlirining namayishchilargha nisbeten sewrchan bolghanliqini, eksiche namayishchilarning bigunah ademlerni öltürgenlikini tekitlep kelgen idi. (Jüme)