Yawropa ittipaqi xitayning toqumichiliq mallirigha cheklime qoyushni agahlandurdi

Yawropa ittipaqi béyjing hökümitining xitay mallirining yawropa bazirigha tökme qilinishining jiddiy aldini élishini, bolmisa yawropa ittipaqining xitaydin import qilinidighan ikki türdiki toqumichiliq malgha cheklime qoyidighanliqini agahlandurdi.

Yawropa ittipaqining soda komissari pétér mandélson yene, xitay bilen paxta mayka we kendirlik toqulma mehsulatliri üstide jiddiy söhbet élip bérishni telep qildi hemde eger xitay 90 künning ichide héchqandaq chare qollanmisa, yawropa ittipaqining öz aldigha cheklime qoyiwéridighanliqini bildürdi.

Yawropa ittipaqining xitayning import malliri üstidin yéqinda élip barghan tekshürüshige asaslan'ghanda, xitayning yawropa bazirigha kiriwatqan toqumichiliq malliri téz sür'ette éship, hetta bu yil 1 - aydin hazirghiche bolghan mezgilde 534٪ ashqan.

Yawropa birliki bu qararni chiqirishtin bir nechche kün ilgiri amérika hökümiti xitayning ishtan, paxta mayka we ich kiyim qatarliq3 türdiki toqumichiliq mallirigha cheklime qoyidighanliqini jakarlighan idi. Bu xitay hökümitining qattiq naraziliqini qozghidi. (Peride)