Yawropa ittipaqi bilen xitay toqumichiliq malliri üstide söhbet bashlidi

Yawropa ittipaqi wekilliri charshenbe küni béyjinggha kélip, xitay da'iriliri bilen toqumichiliq malliri majirasini qandaq hel qilish mesiliside söhbet bashlidi.

En'gliye b b s radi'o- téléwiye shirkitining xewer qilishiche, yawropa ittipaqining xitaydin import qilidighan toqumichiliq mehsulatlirining sani yilliq chekke yetken bolup, nöwette nurghun xitay malliri yawropa döletlirining tamozhnisida tosup qélin'ghan. Xitay da'iriliri bu qétimliq söhbet arqiliq yawropa ittipaqining, xitay toqumichiliq mallirigha bolghan import miqdarini köpeytip bérishini ümid qilidiken.

Yawropa ittipaqi tamozhnisida, bir xitay sodigiriningla 15 milyon dane maykisi tutup qélin'ghan. Xitay da'iriliri bu ehwalning xitaydiki ishlepchiqirish orunlirigha ziyan yetküzüpla qalmastin, yawropadiki xéridarlarghimu tesir körsitidighanliqini tekitlidi.

Yawropa ittipaqi, yéqinqi yillardin buyan xitay mallirining yawropagha zor türkümde tökme qilinishi sewebidin, bu yil xitayning toqumichiliq mallirigha cheklime qoyghan idi. Shundaqla ikki terep bu qétimqi söhbette kéler yilliq import mallirining cheklimisini belgileydiken. (Peride)