Хәлқара җәмийәт апәт районидики қутқузуш һәрикитини күчәйтти

Хәлқара җәмийәт һинди окян апәт районидики қутқузуш һәрикитиниң көлимини кеңәйтмәктә. Канада апәткә учриған дөләтләрдин алидиған қәрзини кечиктүрди. Америка деңиз, һава вә деңиз армийисиниң пиядиләр қисими сәпәрвәр қилип, апәт районидики кишиләрни қутқузушқа маңдурди. Америка ташқий ишлар министири колин повелл апәт районини көздин кәчүриду. Америка президенти бушнниң билдүрүшичә, колин повелл башчилиқидики тәкшүрүш өмики америкиниң қанчилик ярдәм беришигә тоғра келидиғанлиқини мөлчәрләйду. Америка һазирчә 35 милйон доллар ярдәм беридиғанлиқини елан қилди. Бирақ колин повелл, америкини техиму көп ярдәм беридиғанлиқини билдүргән.

Әнгилийидә пуқралар 40 милйон фонд стерлиң пул топлиди. явропа иттипақи, 300 милйон явро ярдәм қилишқа тәйярлиқини билдүргән. Хитай һөкүмити 60 милйон доллар ярдәм қилидиғанлиқини елан қилди. Буниңдин илгири хитайлар 2.5 Милйон доллар ярдәм қилған болуп, бу хәлқара җәмийәтниң тәнқидигә учриған иди. Дуня банкиси 250 милйон доллар ярдәм қилидиғанлиқини җакарлиған. Хәвәрләргә қариғанда бүгүнгичә, хәлқара җәмийәтниң ярдими 500 милйон долларға барған. Мутәхәсисләрниң пәрәз қилишичә, бу қетимқи вәқәдә келип чиққан иқтисади зиян 14 милярд долларға йетидикән. Вәқәдә өлгәнләрниң сани һазирғичә 120 миңдин ашқан, һиндинозийиниң өзидә 80 миңдин 100 миңғичә киши өлгән болуши мумкин. (Әркин)