Кофи әннан апәткә учриған раюнларниң әслигә келиши үчүн он йил вақит кетидиғанлиқини билдүрди

Б д т ниң баш секритари кофи әннан өткән һәптә җәнубий асияда йүз бәргән йәр тәврәш вә сунами деңиз долқуни апитиниң зәрбисигә учриған районларниң 10 йилға йеқин вақит ичидә аран әслигә келиши мумкинликини билдүрди. У нөвәттики қутқузуш паалийәтлириниң апәткә учриған он нәччә дөләттә охшашла қийинчилиққа учраватқанлиқини көрсәтти.

Чәтәл ахбаратлириниң хәвәрлиригә қариғанда, қутқузуш боюмлири апәткә учриған районларға җиддий тошуливатқан болсиму, әмма қаттиқ ямғур вә қатнашниң қолайсизлиқи төпәйлидин, кишиләрниң ярдәм боюмлириға еришиши тәсиргә учриған.

Америка вә австралийә қатарлиқ дөләтләр тик учар айропиланлар арқилиқ һиндинозийиниң аче вилайитиниң шәрқидә қамилип қалған кишиләргә түнҗи қетим ашлиқ вә бир қисим җиддий боюмларни йәткүзгән. Қутқузғучи хадимлар бир һәптидин боян сунами деңиз долқуни апитиниң тәсиригә әң еғир учриған аче вилайитиниң көп қисим раюнлириға беришқа амалсиз қалған иди.

Бирләшкән дөләтләр тәшкилатиниң әмәлдарлири, һиндинозийидә бир милйон , серланкида 700 миң кишиниң өй маканлирини қурғичә болған бир нәччә ай ичидә ашлиқ вә башқа ярдәм буюмлириға җидди муһтаҗ болидиғанлиқини көрсәтти. Уларниң билдүрүшичә, хәлқара җәмийәт бу қетимқи апәткә җидди инкас қайтуруп, һазирғичә 2 милярд доллардәк ярдәм пули бәргән.

Өткән йәкшәнбә күни йүз бәргән һинди окяндики йәр тәврәш вә сунами деңиз долқуни апити, әтраптики раюнларда 130 миңдин артуқ кишиниң өлишини кәлтүрүп чиқарған иди. Бирләшкән дөләтләр тәшкилатиниң қутқузуш ишлириға мәсол хадими апәттә өлгәнләр саниниң 150 миңдин ешиши мумкинликини билдүрди. У шундақла йәнә, апәттә әмилий өлгәнләр саниниң мәңгү ениқланмаслиқи мумкинликини, чүнки нурғун адәмләрни деңиз йүтүп кәткәнликини көрсәтти. (Арзу)