Jakartada hindi okyandiki déngiz tashqini apitini qutquzush heqqide jiddi yighin ötküzüldi


2005-01-06
Share

Dunyadiki her qaysi döletlerning rehberliri peyshenbe küni hindonéziyining jakarta shehiride yighin échip, apetke uchrighan döletlerge béridighan yardemni kücheytidighanliqini bildürdi.

Yighinda her qaysi dölet rehberliri birleshme xitabname élan qilip, tragédiyining qayta yüz bérishining aldini élish üchün, hindi okyanda déngiz dolqunidin aldin signal bérish sistémisi qurushqa yardem béridighanliqini körsetti.

B d t ning bash sékritari kofi ennan, her qaysi döletlerni wede qilghan yardem sommisini derhal emilleshtürüshke chaqirip, nöwette apetke uchrighan xelqning az digende bir milyard dollar jiddiy yardemge muhtaj ikenlikini bildürdi. B d t emeldarlirining bildürishiche, xelq'ara jem'iyetning wede qilghan yardem sommisi 4 milyard amérika dollirigha yéqinlashqan. Emma ilgiriki tejribilerge qarighanda, wede qilin'ghan yardem sommilirining hemmisining emeliylishishi natayin.

Xewerlerge qarighanda, zor miqdardiki su , ashliq we dawalash boyumliri apetke uchrighan 11 döletke jiddi toshulmaqta. Shuning bilen bir waqitta, xelq'ara pul mu'amile fondi jem'iyiti hindi okyandiki déngiz tashqini apitige uchrighan xelqlerge bir milyard dollar yardem bérishke wede qildi. Yawrupa birlikimu yene 460 milyon dollar pul ajritidighanliqini bildürdi.

Jakartadiki yighin'gha qatnashqan amérika tashqi ishlar ministiri kolin pawil, washin'gitonning apetke uchrighan rayunlargha kétidighan qutquzushqa qanchilik meblegh kétidighanliqini tekshürgendin kiyin, yardemni yenimu köpeydighanliqini bildürgen hemde amérika armiyisining taylandtiki keng kölemlik qutquzush heriketlirining dawamlishidighanliqini körsetken.

Ötken yili 12 - ayning 26 - küni hindi okyanda yüz bergen dehshetlik yer tewreshtin kélip chiqqan déngiz tashqini apitide hazirghiche 150 ming adem öldi. Apetke eng qattiq uchrighan hindonéziye, sirlanka, tayland we hindistandiki ahaliler yenila her xil yardem buyumlirigha jiddiy ehtiyajliq iken. (Arzu)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet