Hindi okyandiki déngiz tashqini apitidin kiyinki qutquzush pa'aliyetliri dawamlashmaqta

Hindi okyandiki yer tewreshtin kélip chiqqan déngiz tashqini apitige qattiq uchrighan hindonéziye we sérlankining hökümet da'iriliri, mezkur döletlerde yardemde boliwatqan chet'el xadimlirini bixeterlikige diqqet qilishqa chaqirdi.

Amérika birleshme axbarat agéntliqining xewirige qarighanda, yekshenbe küni bir qisim qoralliq kishiler hindonéziyidiki eng chong qutquzush bazisining etrapida oq chiqarghan. Weqede adem ölüp - yarilanmighan bolsimu, emma qutquzush xadimlirining bixeterlikige bolghan endishiler kücheygen. Sérlankining sherqiy teripidimu xiristiyanlar we hindilar ) hindus( otturisida toqunush yüz bérip, weqede az dégende üch adem ölgen, 37 adem yarilan'ghan.

Biraq qutquzush xadimliri yene dawamliq bu rayonlargha yitip kélip, apetke uchrighanlargha yardem bérish pa'aliyetlirini dawam qilmaqta. Bu arida, birleshken döletler teshkilatining bash sékritari kofi ennan sérlankidiki apetke uchrighan rayonlarni ziyaret qilip, apetke uchrash ehwallirini közdin kechürdi. Uning bilen bille ziyarette bolghan dunya bankisining bashliqi, dunya bankisining apettin qutquzush ishlirigha bir milyard besh yüz milyon dollar pul ajritishi mumkinlikini bildürdi.

Buning bilen hökümet we xelqlerning apettin qutquzush ishlirigha yardem bérish yolida wede qilghan yardem puli besh milyard dollardin ashti. Dunyadiki sana'etleshken asasliq döletlermu birlikte kélishim imzalap, apetke uchrighan döletlerning qerzini bikar qilidighanliqini bildürdi. Bu, jenubiy asiyadiki döletlerge yene nechche milyard dollar pul tijep bergen.

Ikki hepte awal yüz bergen hindi okyandiki yer tewresh we déngiz tashqini apitide ölgenlerning sani nöwette 153 mingdin ashqan. Sehiye emeldarliri, weqede bextige yarisha qutulup qalghanlar'ichide, yarilan'ghanlarning dawalinalmasliqi we her xil yuqumluq késeller sewebidin ölgenler sanining yenimu köpiyishidin endishe qilmaqta. (Arzu)