Türkiye barliq türkiy tilliq döletlirige qaratqan wiza tüzümini bikar qilmaqchi

Türkiye rehbiri abdulla gülning azerbeyjan sepiride türkiyining barliq türkiy jumhuriyetler puqralirining wizasiz halda türkiyige kirip chiqishini yolgha qoyidighanliqini bildürgen.

Perghane agéntliqining xewer qilishiche, türkiye hökümiti bu qararni bu yil iyulning axirida qobul qilghan bolup, bu aldi bilen yawropa ittipaqining naraziliqini qozghighan. Yawropa ittipaqi türkiyining yawropa ittipaqigha kirishi mesilige a'it her yili élan qilidighan doklatida bu mesilini tilgha élip, bundaq mexsus türkiy döletlerge qaratqan wiza tüzümini bikar qilishning türkiyining yawropa ittipaqigha kirishidiki chong mesile bolidighanliqini körsetken. Abdulla gül mezkur mesilide yawropa ittipaqining bu tenqidige pisent qilmighan.

Prézidént abdulla gül "qérindash eller arisida xuddi én'giliz tilliq döletler hemdostluqi dégen'ge oxshash özlirining hemdostluqini qurush üchün héchqandaq tosalghu bolmasliqi lazim" dep körsitip, türkiyining buning üchün qérindash türkiy döletlerge qaratqan wiza tüzümini bikar qilidighanliqini bildürgen. Abdulla gül bu qétim türkmenistan, qazaqistanlarni ziyaret qilmaqchi, u yene bu yilning axirighiche özbékistan hem qirghizistan'gha bérishni pilanlighan.

Türkiye prézidénti abdulla gül türkiy döletlerning birliki mesilisi heqqide toxtilip. " Biz türkiy tilliq döletler bilen 1990 - yillarning béshidin tartip romantik munasiwetlerge ige bolup kelduq. Biz iqtisadni asas qilghan munasiwetlerni bashlishimiz lazim " dep tekitligen. (Ümidwar)