Йәкшәнбә күни түркмәнистанда сайлам башлиниду


2007-02-10
Share

20 Йилдин бери бир диктатор тәрипидин идарә қилинған түркмәнистан хәлқи, йәкшәнбә күни өзлиригә йеңи бир президент сайлаш үчүн сайламға қатнишиду. Бу қетимқи президент сайлиминиң алаһидилики, гәрчә түркмәнистанда пәқәт бир партийә, йәни сәпәр мурат ниязофниң демократийә партийиси мәвҗут болсиму, бир нәччә кишиниң өзини президент вәзиписигә намзат көрсәткәнликидур.

Бу қетимқи президент сайлимида 6 киши өзини намзат көрсәткән. 2006‏- Йили 21‏- декабир күни туюқсиз өлгән түркмәнистан президенти сәпәр мурат ниязоф, 20 йил түркмәнистанни қаттиқ қоллуқ билән идарә қилип кәлгән. У үзини пүтүн түркмәнләрниң атиси дәп атап, һәтта күнләр, һәптиләр вә айларниң исмини өзгәртип, уларға өз, ата-аниси вә уруқ -туғқанлириниң исмини қойған иди.

Лекин, түркмәнистанниң вақитлиқ президент вәзиписини өтәватқан қурнағули бәрдимоһәммәдоф, гәрчә өзи 6 президент намзатиниң бири болсиму, ниязофниң сияситини өзгәртип, пүтүн намзатларға телевизийидики тәшвиқатларда охшаш вақит аҗратмақта.

Бәзи сиясий мулаһизичиләр, бу сайлам мол нефит вә тәбий газ мәнбәлиригә игә һәмдә истратегийлик җәһәттин әһмийәтлик түркмәнистанниң аста-аста сиясий йөнилишини өзгәтиватқанлиқиниң бир бишарити һесаблиниду, дейишмәктә.

Әмма түркмәнистан рәһбәрлириниң өзлирини 2006‏- йили 21‏- декабир күни туюқсиз вапат болған түркмәнистан президенти сәпәр мурат ниязофниң тәсиридин қандақ қилип қутқузалайдиғанлиқи мәлум әмәс. (Қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт