Вен җябав түркмәнистанни зиярәт қилди


2007-11-04
Share

Ташкәнт сәпирини ахирлаштурған хитай баш министири вен җябав 3 - ноябир күни кәчтә түркмәнистан зияритини башлиди, у шу күни ахшими түркмәнистан пайтәхти ашхабад айродромида түркмәнистан ташқи ишлар министири мелодофниң қарши елишиға еришти.

4 - Ноябир күни ашхабадтики президент сарийиниң алдидики мәйданда президент қурбангүл бәрдимуһәммәдоф һөрмәт қаравуллири билән бирликтә вен җябавни дағдуғилиқ күтүвалған һәмдә вен җябав билән қурбангүл бәрдимуһәммәдоф арисида икки дөләтниң сиясий, сода-иқтисад һәм енергийә қатарлиқ һәр саһәдики һәмкарлиқлири мәсилисидә сөһбәтләр елип берилған.

Шу күни йәнә вен җябав түркмәнистан хәлқ мәҗлиси рәиси нур бәрдийева ханим биләнму көрүшүп, сөһбәт елип барған.

Бу вен җябавниң тунҗи қетим түркмәнистанни зиярәт қилиши болуп, бу йил 7 - айда түркмәнистанниң йеңи президенти қурбангүл бәрдимуһәммәдоф бейҗиңни зиярәт қилип, рәис ху җинтав вә баш министир вен җябав билән көрүшүп, икки дөләт мунасивәтлирини күчәйтишкә вәдә бәргән һәмдә мәрһум президенти сәпәр мурат ниязов дәвридә имзаланған енергийә вә сиясий мәсилиләргә аит келишимләрниң давамлиқ күчкә игә болидиғанлиқини билдүргән иди.

Русийә агентлиқлириниң хәвәр-анализлириға асасланғанда, түркмәнистан шаңхәй һәмкарлиқ тәшкилатиға әза дөләт әмәс, бирақ у енергийигә бай мәмликәт болуп, хитай тәрәп түркмәнистан билән тәбиий газ турубиси қуруп, түркмәнистан хитайға һәр йили 30 милярд куб метир тәбиий газ маңдурушқа қошулған болсиму, бирақ, русийә охшашла түркмәнистан билән тәбиий газ келишими түзүп, түркмән газлирини русийигә тартишқа келишим һасил қилған, явропа иттипақи болса каспи деңизи арқилиқ түркмән газлирини кичик асия йоли билән явропаға маңдуруш тәклиплирини бәрмәктә.

Мана мушундақ мурәккәп риқабәткә дуч кәлгән хитай имкан қәдәр түркмәнистанни қолға кәлтүрүш үчүн тиришмақта. Русийә болса, хитайниң әң чоң енергийә риқабәтчисигә айланған. Шу вәҗидин хитай баш министириниң бу қетимқи зиярити муһим истратегийилик мәқсәтләрни көзлигән. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт