Пакистан бир нәпәр әл-қаидә башлиқини қолға чүшүрди

Пакистан даирилири әл-қаидә тәшкилатиниң юқири дәриҗилик әмәлдари абу фараҗ әл-либбини қолға алди.

Пакистан учур министири шәйих рәшидә әхмәт, пакистан бихәтәрлик қисимлириниң абу фараҗ әл-либбини өткәнки бир- икки күн ичидә пакистанниң ғәрбий шималидики вазиристан өлкисидә қолға чүшүргәнликини, шундақла бу тоқунушта йәнә, аз дегәндә 5 нәпәр чәтәллик әл-қаидә тәшкилати әзасини тутқанлиқини билдүрди.

Рәшидә әхмәт йәнә, бу кишиләрни тутқандин кейин, бихәтәрлик хадимлириниң һазирғичә нурғун учурларға еришкәнликини, шундақла буниң, уларниң әл-қәидә рәһбири осама бин ладенни тутуш йолидики қәдиминиң тоғра бесиливатқанлиқидин дерәк беридиғанлиқини билдүрди.

Әл-либби, 2003 - йили декабирдики пакистан президенти пәрвәз мушәррәфни өлтүрүш сүйқәстиниң орунлаштурғучиси дәп гуман қилинған болуп, буниңдин сирт у йәнә, өткән йили йүз бәргән баш министир шәвкәт әзизни қәстләп өлтүрүш вәқәсиниңму җинайәт гумандари һесаблиниду.

Әл- либби, пакистан һөкүмити 20 милйон рупи йәни 340 миң америка доллири тутуш мукапати чиқарған киши. Америка һөкүмити болса униң үстидин 5 милйон америка доллири тутуш мукапати чиқарған. (Пәридә)