Chégrisiz muxbirlar teshkilati : xitay özining yéngi axbarat belgilimisige hörmet qilish kérek

Xitay dölet kabinti qarmiqidiki uchurlashturush xizmiti ishxanisining mes'uli sey wushing peyshenbe küni xitay hökümiti bu yil 1 - aydin bashlap yolgha qoyghan axbarat erkinlikini kéngeytish toghrisidiki yéngi belgilimining béyjing olimpik musabiqisidin kéyinmu üzlüksiz küchke ige bolush éhtimali barliqini bildürgendin kéyin, merkizi parizhdiki chégrisiz muxbirlar teshkilati xitayning bu wedisige guman bilen qaraydighanliqini bildürdi.

Mezkur teshkilat jüme küni élan qilghan bayanatida bu xitay da'irilirining hazirgha qeder bergen nurghun wedilirining biri, dep körsetti shundaqla muhimi uni uzartish emes, belki uninggha ri'aye qilishtur, dep eskertti.

Xitay da'iriliri bu yil 1 - ayning 1 - künidin bashlap yolgha qoyushqa bashlighan yéngi axbarat belgilimiside chet'ellik muxbirlarning xitaydiki her qaysi ölke - aptonom rayonlargha bérishigha ruxset bérish we xalighan ademni ziyaret qilishigha bolidighanliqini ilgiri sürgen bolsimu, lékin Uyghur ili, tibet yaki ichkiridiki toqunush yüz bergen sezgür rayonlarni ziyaret qilghan chet'ellik muxbirlar agahlandurulghan. Közetküchilerning eskertishiche, yéngi axbarat belgilimisi tibet bilen Uyghur ilini öz ichige almaydighan bolup, bu rayonlarni ziyaret qilish üchün yenila da'irilerning testiqini élishqa toghra kélidiken.

Chégrisiz muxbirlar teshkilati mezkur belgilime yolgha qoyulghandin béri, 65 neper chet'ellik muxbirning tutqun'gha uchrighanliqini, tayaq yigenlikini, tosqunluqqa we tehditke uchrighanliqini bildürdi shundaqla 26 - dékabir küni gu'angdungning dungju yézisida yüz bergen toqunushni xewer qilmaqchi bolghan bir neper birleshme axbarat agéntliqi muxbirining saqchilar teripidin tutup qélin'ghanliqini eskertti. (Erkin)