Yoshinko ukra'iniye prézidénti bilen söhbetlishishke qoshuldi

Ukra'iniyining öktichi prézidént namzati wiktor yoshinko yekshenbe künidiki saylam majrasini hel qilish üchün ukra'iniye prézidénti li'onid kuchma bilen söhbetlishishke qoshuldi.

Amérika birleshme axbarat agéntliqining charshenbe küni bildürishiche, ukra'iniye prézidénti kuchma yene ukra'iniyidiki barliq siyasiy gorohlarni bu heqte jiddiy söhbet ötküzüshke chaqirdi.

Buning aldida prézidént saylimida saxtiliq körüldi dep qarighan yoshinkoning 200 mingdin oshuq qollighuchiliri, paytext kyéwdiki prézidént ishxanisi aldida namayish ötküzüp, hökümetning öktichi namzat yoshinkoni saylamda utti dep élan qilishini telep qildi.

Ukra'iniye hökümiti deslep chiqarghan saylam netijiside bash ministir yanukowichning 3٪ awaz üstünlük bilen yoshinko üstidin ghelibe qilghanliqini jakarlighan idi. Shundaqla nöwettiki prézidént kuchmaning özi bash ministir yanukowichni qollaydu.

Xewerde körsitilishiche, öktichi namzat yoshinko riqabetchisi yanukowich bilen körüshüshke qoshulmaydiken. Gerche prézidént bilen ötküzidighan söhbetning charshenbe küni qandaq waqitta, nede élip bérilidighanliqi téxi éniq bolmisimu, lékin yoshinko terepdarlirining bildürishiche, ular peqet bir xil shertnila qobul qilidiken, u bolsimu, hökümet saylamda saxtiliq körülgenlikini étirap qilip, yoshinkoning prézidént saylimida utqanliqini jakalash iken. (Peride)