Украинийә алий сот мәһкимиси сайламни инавәтсиз қилди

Украинийә алий сот мәһкимиси җүмә күни һөкүм чиқирип, 21 - ноябирдики украинийә президент сайлиминиң нәтиҗисини инавәтсиз, дәп җакалиди. Шундақла қайта сайлам елип беришни қарар қилди.

Америка бирләшмә ахбарат агентлиқиниң хәвәр қилишичә, украинийә алий сот мәһкимисиниң сотчиси анатоли ярема, қайта сайлам 26 - декабирда елип берилиши керәк, дәп қарайдиғанлиқини билдүргән.

Көзәткүчиләрниң илгири сүрүшичә, украинийә алий сот мәһкимисиниң сайлам нәтиҗисини инавәтсиз қилиш һәққидики қарари, юшинко башчилиқидики өктичиләрниң зор ғәлибиси болуп һисаплиниду. Алий сот, қайта сайламниң кәлгүси 3 һәптә ичидә елип берилишини қарар қилған.

Интер факс ахбарат агентлиқи, украинийә алий сот мәһкимисиниң қайта сайлам елип беришни қарар қилипла қалмай, украинийә мәркизи сайлам комитетиниң 21 - ноябирда елан қилған украинийә баш министири януковечниң сайламда ғәлибә қилғанлиқи һәққидики қарариниму инавәтсиз, дәп җакалиғанлиқини хәвәр қилди.

яшинко башчилиқидики өктичиләр, 21 - ноябирдики президент сайлимида укранийидики 25 областниң 8 дә сахтипәзлик вәқәлири йүз бәргәнликини елан қилип, алий сот мәһкимисигә дава ачқан . явропа иттипақи билән америка сайлам нәтиҗисини етирап қилмайдиғанлиқини җакалиған. Русийә, блурусийә, қазақистан, қирғизистан вә өзбекистанлар сайламда ғәлибә қилғанлиқи елан қилинған януковечни қоллиған иди. (Әркин)