Йошинкониң қоллиғучилири украинийә парламент бинасини қайта қоршивалди


2004.12.29

Украинийидики өктичиләрниң рәһбири йошинкониң қоллиғучилири парламент бинасини қайта қоршивелип, украинийә һөкүмити ички кабинтини чаршәнбә күнидики бир йиғинини әмәлдин қалдурушқа мәҗбур қилди.

Америка бирләшмә ахбарат агентлиқиниң хәвиридә көрситилишичә, гәрчә ахирқи қетимлиқ президент сайлимида өктичиләр рәһбири йошинко утуп чиққан болсиму, әмма украинийә һөкүмитидики асаслиқ әмәлдарлар техичә вәзиписидин қалдурулмиған иди.

Шундақла йәнә бир президент кандидати нөвәттики баш министир янукович өзиниң уттурғанлиқиға тән бәрмәй, сайламда сахтилиқ көрүлгәнликини билдүрди һәмдә чаршәнбә күнидә ички кабинт йиғини чақиришни пиланлиған иди. Әмма бу йошинко қоллиғучилириниң қаршилиқи түпәйлидин әмәлдин қалдурулди.

Өктичиләр рәһбири йошинко сайламда утуп турупму, украинийә ички кабинтиниң техичә тарқитиветилмигәнликини әйиплиди. У йәнә, "қайси бир дөләтниң һөкүмити сайламда уттуриветипму йәнила тәхттин чүшмәй туривалиду? бундақ қанунсиз һөкүмәт әмди йиғин ачимиз дәп олтурмаслиқи керәк." Дәп билдүрди.

Бу қетимлиқ украинийә сайлими, руспәрәс шәрқий украинийә билән милләтчи ғәрбий украинийә оттурисидики шундақла русийә билән ғәрп әллири оттурисидики бөлүнүшни техиму чоңқурлаштурди. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.