Amérika herbiy da'iriliri: amérika - xitay otturisida urush partlash mümkinchiliki azaymaqta

• 
  2006-02-03

Amérika armiyisining birleshme shtab re'isi pétir péys jüme küni jenubiy koriye paytexti séyolda, xitay - amérika soda iqtisadi munasiwitining küchiyishige egiship, amérika - xitay otturisida urush partlash mümkinchiliki azaymaqta, dep körsetti.

Gerche xitay iqtisadining tereqqiyati, mexpiy herbiy qurulushi we teywen boghizidiki tirkishish amérikida endishe qozghawatqan bolsimu, emma pétir péys, washin'gon bilen béyjingning aridiki ixtilaplardin ortaq menpe'eti köprek ikenlikini bildürdi. U, "men xitay mesiliside kélechekke ümidwarliq bilen qaraymen. Bu yerde ikki döletning menpe'et jehette oxshaydighan terepliri, oxshimaydighan terepliridin köp " deydu.

U mundaq dédi: bizning xitay - amérika otturisida iqtisadi köwrük berpa qilishimizgha egiship, ikki döletning güllinishte bir birige tayinishi kücheymekte. Bu ikki terep arisida toqunush peyda bolush mumkinchilikini barghanche azaytmaqta "

Amérika herbiy da'iriliri ötken yili élan qilghan herbiy doklatida, xitayning emeliyettiki herbiy xam choti junggo hökümiti élan qilghan resmiy sandin ikki hesse köp bolup, 90milyard dollargha yétidighanliqini tekitligen idi. Ötken ayda yaponiye xitay herbiy xam chotining éniq emesliki sewebidin xitayni yoshurun herbiy tehdit kélidighan döletler tizimlikige kirgüzgen.

Pétir péys, séyolgha jenubiy koriyide turushluq amérika qisimlirining qomandanliqini ötküzüwélish we ötküzüp bérish murasimigha qatnishish üchün kelgen. Nöwette 37 ming kishilik amérika qisimi jenubiy koriyide turmaqta. Bu yerde turushluq amérika qisimlirining qomandanliqini géniral béll ötküzüwalghan. Pétir péysning tekitlishiche, jenubiy koriyide turushluq amérika qisimlirining sani 2008 - yilghiche 25 minggha qisqartilidiken. (Erkin)