Amérika döletlik axbarat bash nazaretchisi : amérika xitay tehditidin endishe qilidu

Micheal McConnell Parlaméntta dokilat bermekte

Amérika döletlik axbarat bash nazaretchisi Micheal McConnell, aldinqi küni amérika dölet mejlisi kéngesh palatasining axbarat komitétigha yer sharidiki tehditler toghrisida doklat tapshurup, xitaydin kélidighan tehditning özliride endishe yaritiwatqanliqini bildürdi. Doklat tapshurush munasiwiti bilen ötküzülgen ispat bérish yighinida McConnell, xitayning intérnét, qoral - yaraqlar jehettiki tehdit sélish küchi shundaqla amérikining alem boshluqi eslihelirige élip kélidighan tehditi heqqide toxtaldi. Töwende muxbirimiz erkin bu toghrisida melumat béridu.

McConnell , xitayning herbiy tereqqiyati amérikigha tehdit

Amérika kéngesh palatasi axbarat komitétidiki ispat bérish yighini, amérika axbarat we bixeterlik organlirining yilda bir qétim élan qilidighan yer sharida mewjüt tehditler toghrisidiki doklatini dölet mejlisige tapshurush munasiwiti bilen chaqirildi. Yighinda amérika döletlik axbarat bash nazaretchisi McConnell, amérikigha kélidighan tehditni asasliqi el- qa'ide, térrorchiliq, iraqning bixeterliki, amérika pakistan we afghanistanlarda duch kelgen riqabet, qirghuchi xaraktérlik qorallar, iran we shimaliy koriyining yadro qorallar pilani qatarliqlar, dep tekitligen bolsimu, lékin u xitaydin kélidighan tehditni alahide tilgha aldi.

Amérika döletlik axbarat bash nazaretchi ishxanisining doklatida xitay herbiy qisimlirining qoral - yaraqlarni üzlüksiz keng - kölemde tereqqi qildurushi amérika we amérikining asiyadiki ittipaqdashlirigha tehdit élip kélidighanliqini agahlanduridu. U, " xitay urush rayoni balistik bashqurulidighan bomba we charlighuchi bombilirining iqtidarini özgertse, amérika armiyisining muntizim qorallar tehditi astida qélish xewipini kücheytidu. Buning sirtida xitay istratégiyilik yadro qorallar qisimlirini zamaniwiylashturup, bu sahediki yitersizlikini toldurmaqchi boluwatidu " deydu.

Xitay amérika intérnet alaqisigha tehdit salalaydu

McConnell, xitay herbiy qisimlirini zamaniwiylashturushning heriketlendürgüch küchi xitay rehberlirining küchlük hem zamaniwiy armiye chong döletlik orun'gha érishishning muhim amili, dep qarawatqanliqidur, dep körsetti. Doklatta, amérika axbarat organlirining xitay démokratiyige köchken teqdirdimu xitay chong döletlik arzusidin waz kechmeydu, dep qaraydighanliqini tekitligen.

McConnel Amérika intérnét alaqisigha kélidighan tehditler üstide toxtilip, xitay bilen rusiyini öz ichige alghan bir qisim döletlerning amérika alaqe eslihelirini buzghunchiliqqa uchritalaydighan iqtidari barliqini, amérika alaqe séstimisining amérika hökümiti, xususi karxanilar we shexsiy alaqilerde nahayiti muhim orun tutidighanliqi tüpeyli amérika axbarat organlirining amérika alaqe séstimisigha tehdit salalaydighan döletlerni nahayiti diqqet bilen közitidighanliqini eskertti.

U mundaq deydu, " bizning mölcherimizge qarighanda , xitay we rusiye qatarliqlarning amérika intérnét séstimisigha kirip, axbarap toplash iqtidari bar. Kishini endishige salidighini , ular bu alaqe eslihelirini hujum qorali süpitide qollinip, keng kölemlik buzghunchiliq élip baralaydu".

Alem boshluqi riqabiti küchiyishi mümkin

Alem boshluqi riqabiti heqqide toxtalghanda amérika, xitay bilen rusiyining alem boshluqi sahesidiki tereqqiyatigha diqqet qiliwatqanliqini tekitligen McConnell, " eger hazirqi weziyet dawamlashsa alem boshluqi penlirining tereqqiyati üzlüksiz küchiyip,xitay bilen rusiye kelgüside amérikining herbiy we axbarat sün'iy hemrasi shundaqla nérwa séstimisigha hujum qilish iqtidarini hazirlaydu," dep tekitleydu.

McConnell , xitay istratégiyisining aldinqi nishani iqtisadi tereqqiyat sür'iti we siyasiy muqimliqni saqlash bolup, béyjing hökümiti tinch tashqi muhit bu nishan'gha yétishning achquchi, dep qarimaqta, dep körsetti. McConnell , xitayning herbiy qoral - yaraqlar éksport sodisi amérika armiyisining bixeterlikige tehdit peyda qiliwatqanliqini eskertip, xitayning ottura sherqtiki qoral - yaraqlar sodisi bolupmu iran'gha bashqurulidighan bomba sétishi bu rayondiki amérika armiyisige tehdit salmaqta, dep sözlidi.

McConnell Yene xitay, rusiye we néfit éksport qilghuchi döletler teshkilatidiki ellerning amérika bazirini öz siyasi muddi'asi üchün qollinish éhtimali barliqi, xitay teb'iy bayliqlargha érishishte erkin bazar qanalliridin paydiliniwatqanliqini shundaqla dollar üzlüksiz paxallashsa , néfit éksport qilghuchi döletlerning élim - bérimda dollar ornigha bashqa pullarni telep qilishi mumkinlikini eskertti.