Өзбекистанда хәлқаралиқ нахша-музика фестивали өткүзүлди


2007-09-02
Share

Сабиқ совет иттипақи дәвридә шәрқ мәдәнийитиниң вәкили дәп қарилип, москва тәрипидин көплигән дуняви мәдәнийәт фестиваллири өткүзгән өзбекистан мустәқиллиққә еришкәндин кейин, хәлқара сәһнисидә диктаторлуқниң символи сүпитидә тонулуп қелиш билән хәлқаралиқ зор паалийәтләрни уюштурушни актиплаштуралмай қалған болса, униң әксичә қазақистан мәркизий асиядики дуняниң диққитини тартқан дөләткә айланған иди.

Йеқинқи учурлардин қариғанда, президент ислам кәримоф, дөләт образини яхшилаш үчүн бәзи қәдәмләрни басқан болуп, ташкәнт хәлқара ислам қурултийи тәрипидин 2007-йиллиқ дуня ислам пайтәхти дәп аталған.

Пәрғанә учур агентлиқиниң хәвәр қилишичә, 30- авғуст күни өзбекистанниң сәмәрқәнд шәһиридә хәлқаралиқ сәнәт фестивали өткүзүлгән болуп, бу фестивалға мисир, италийә, малайшия, кенийә, җәнубий корийә, хитай қатарлиқ 50 дөләтниң артислири қатнашқан.

Бу фестивалда биринчи дәриҗигә еришкән кишигә 10 миң доллар бериш қарар қилинған болуп, кувейтлик артист биринчи орунни игилигән. Хитай, кенийә вә малайсиялиқ артистлар үчинчи орунни игилигән.

Қирғизистан артислириға коллектип миллий алаһидилики җәһәттин мукапат берилгән болса, әзәрбәйҗан вә өзбекистан артислириму өзигә хас болған мукапатларға еришкән. Хәвәргә асасланғанда, бу қетимқи фестивалда мәхсус шәрқ аһаңлирида нахша ейтиш тәләп қилинған болуп, әмма, хитай вәкиллири ичидә уйғурларниң бар йоқлуқи һәққидә мәлумат берилмигән. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт