Вен җябав мушәррәф билән көрүшти

Пакистанда зиярәттә боливатқан хитай баш министири вен җябав чаршәнбә күни пакистан президенти пәрвиз мушәррәф билән көрүшүп, икки дөләт оттурисидики иқтисадий вә һәрбий һәмкарлиқни күчәйтиш тоғрисида сөһбәтләшти.

Вен җябав буниңдин сирт йәнә, пакистан баш министири шавкәт әзиз биләнму учришип, иккилиси пакистан-хитай достлуқ һәмкарлиқ шәртнамисиға қол қойған. Вен җябав шавкәт әзиз билән елип барған сөһбитидә, хитайниң һиндистан билән пакистан оттурисидики кәшмир мәсилисини һәл қилишқа пүтүн күчи билән ярдәм қилидиғанлиқини билдүргән.

Вен җябав пакистанға 26 дөләт вәкиллири қатнашқан " асия һәмкарлиқ диалоги" йиғиниға қатнишиш үчүн кәлгән болуп, у йәнә чаршәнбә күни мәзкур йиғинға қатнишип, хитайниң мәңгү башқа дөләтләргә һечқандақ тәһдит елип кәлмәйдиғанлиқини һәмдә башқа дөләтләрни контрол қилишқиму урунмайдиғанлиқини билдүрди.

Әмма нурғун уйғур көзәткүчиләр, хитай һөкүмитиниң, уйғур елидики мустәқиллиқ һәрикәтлирини тосуш үчүн, түрлүк амаллар билән оттура асия вә пакистанға охшаш хошна дөләтләр билән болған мунасивәткә алаһидә әһмийәт бериватқанлиқини илгири сүрмәктә.

Вен җябав пакистандики сәпиридин кейин йәнә, һиндистан, бенгал вә сириланка қатарлиқ дөләтләрни зиярәт қилмақчи. (Пәридә)