Wén jyabaw musherref bilen körüshti

Pakistanda ziyarette boliwatqan xitay bash ministiri wén jyabaw charshenbe küni pakistan prézidénti perwiz musherref bilen körüshüp, ikki dölet otturisidiki iqtisadiy we herbiy hemkarliqni kücheytish toghrisida söhbetleshti.

Wén jyabaw buningdin sirt yene, pakistan bash ministiri shawket eziz bilenmu uchriship, ikkilisi pakistan-xitay dostluq hemkarliq shertnamisigha qol qoyghan. Wén jyabaw shawket eziz bilen élip barghan söhbitide, xitayning hindistan bilen pakistan otturisidiki keshmir mesilisini hel qilishqa pütün küchi bilen yardem qilidighanliqini bildürgen.

Wén jyabaw pakistan'gha 26 dölet wekilliri qatnashqan " asiya hemkarliq di'alogi" yighinigha qatnishish üchün kelgen bolup, u yene charshenbe küni mezkur yighin'gha qatniship, xitayning menggü bashqa döletlerge héchqandaq tehdit élip kelmeydighanliqini hemde bashqa döletlerni kontrol qilishqimu urunmaydighanliqini bildürdi.

Emma nurghun Uyghur közetküchiler, xitay hökümitining, Uyghur élidiki musteqilliq heriketlirini tosush üchün, türlük amallar bilen ottura asiya we pakistan'gha oxshash xoshna döletler bilen bolghan munasiwetke alahide ehmiyet bériwatqanliqini ilgiri sürmekte.

Wén jyabaw pakistandiki sepiridin kéyin yene, hindistan, bén'gal we sirilanka qatarliq döletlerni ziyaret qilmaqchi. (Peride)