Dunya sehiye teshkilati Uyghur élide eydizning aldini boyiche terbiyilesh kursi bashlandi


2006.07.05
Share on WhatsApp
Share on WhatsApp

Dunya sehiye teshkilati bilen amérika morinno fondi jem'iyitining Uyghur élidiki tunji nöwetlik eydizning aldini élish-kontrol qilish boyiche késellerge qarighuchilarni terbiylesh kursi 7‏-ayning 3‏- küni ürümchide bashlandi. Buninggha Uyghur élining her qaysi jayliridin kelgen 250 neper qarighuchi qatnashti.

Xitay xewer agéntliqining melum qilishiche, Uyghur éli xitay boyiche eydizning yüz bérish nisbiti eng yuqiri rayon bolush bilen birge, bu yerde eydizning aldini élish we uni dawalash weziyiti intayin tes ehwalda iken. Shu sewebtin, bu yil Uyghur aptonom rayonidiki késellerge qarighuchilar jem'iyiti dunya sehiye teshkilati we amérika morinno fondi jem'iyitining medet bérishi bilen bu kursni achqan.

Shundaqla dunya sehiye teshkilatining gherbiy tinch okyan rayonidiki késellerge qarighuchilar bashqarmisining emeldarliri, amérika morinno fondi jem'iyitining mutexessisliri bu kursta xalisane ders ötüp bérish üchün Uyghur élige kelgen.

Xewerdin melum bolushiche, bu tür 5 yil dawamlishidiken. Shundaqla buningdin kéyin dunya sehiye teshkilati Uyghur élidiki eydiz ehwali bir qeder nachar bolghan ili we qeshqer qatarliq jaylargha bérip, doxtur, sistéralarni terbiyleydiken hetta eydizge giriptar bolghanlarning a'ile-tawabatlirigha yüz turane ders ötidiken.

Xitay da'irilirining bu yil chiqarghan doklatigha qarighanda, nöwette Uyghur élide eydiz wirusi bilen yuqumlan'ghuchilarning sani 14 mingdin ashqan bolup, hazirghiche 91 kishi eydiz késili bilen ölgen. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.