Tokyo sot mehkimisi xitaylarning tölem tölitish erzini ret qildi

Yaponiyining tokyo shehiridiki yuqiri derijilik bir sot mehkimisige 2 - dunya urushi dewride yaponiye hökümiti we yaponiye shirketliri teripidin qullar emgikige sélin'ghanliqini dawa qilip, tölem tölep bérishni telep qilghan xitay puqralirining erzi mezkur sot mehkimisi teripidin jüme küni ret qilindi.

Yuqiri sot mehkimisining sotchisi nobo akatsuka, yaponiye shirketlirining urush dewride kishilerni séstimiliq türde we da'im nachar shara'itlar astida mejburiy emgekke salghanliqini étirap qilghan bolsimu, lékin dawagerlerning tölem tölitiwélish telipini qanuni waqit cheklimisi ötüp ketkenliki sewebidin ret qildi.

Dawagerler bolsa sot mehkimisining qararini adaletsiz boldi, dep eyiblimekte. Dawagerlerning adwokati yaponiye aliy sot mehkimisige yuqiri sotning hökümini aghdurushni telep qilip erz sunidighanliqini bildürgen.

1944 We 1945- yilliri yaponiye armiyisi teripidin gherbiy - shimaliy yaponiyige élip bérilip qurulush we kömür kénida mejburiy emgekke sélin'ghanliqini we 7milyon 25 ming dollar tölem tölep bérishni erz qilghan xitay puqralirining köpchiliki hazir hayat bolmisimu, lékin ularning a'ile - tawabati wakaliten erz qilmaqta. Ular yaponiyining xazama, furukawa, mitsubishi, nishimatsu qatarliq 10 shirkitini erz qilghan. 2003 - Yili yaponiyining töwen derijilik bir sot mehkimisi dawagerlerning erzini yaponiye hökümiti we shirketliri shexsilerning ziyinigha mes'ul emes, dep höküm chiqarghan idi. (Erkin)