Bush hökümiti dölet mejlisining xelq puli mesiliside xitayni cheklesh qanuni chiqirishini qollimidi

Bush hökümiti amérika dölet mejlisining xitayni xelq puli qimmitini tengsheshke qistaydighan qanun chiqishidin bi'aram boluwatqanliqini bildürdi. Amérika maliye we soda ministirliqidiki emeldarlar aldinqi küni dölet mejliside guwahliqtin ötkende, bu qanun ijra qilinsa uning eksiche ünüm bérishidin ensireydighanliqini, hetta buning soda békinmichilikige sewebchi bolush éhtimali barliqini bildürdi.

Amérika maliye ministirliqining mu'awin yardemchi ministiri Mark Sobel ning eskertishiche, amérika xitayni xelq puli siyasitini tengsheshke qistimaqta shundaqla amérika maliye ministiri pa'ulson xitay ziyaritide xitay rehberlirini xelq pulining qimmitini erkin qoyuwétishke ündigen.

Sobel, gerche amérika maliye ministirliqi xelq pulining islahat sür'itidin memnun bolmisimu, lékin dölet mejlisi hazirlighan qanun layihiliri bu mesilini hel qilalmaydighanliqini bildürdi. U mundaq deydu, " bizningche , xitay bilen biwaste söhbet élip bérish we alaqe qilish meqsitimizge yétishtiki eng toghra yoldur. Biz köplep qanun chiqirilsa bu xitay pulining islahat qedimini shunche tézlitidu, dep qarimaymiz. "

Yighinda amérika soda ministirliqining yardemchi ministiri David Spooner, soda ministirliqi xitayning éksport tawarlirigha toluqlima yardem puli bérish mesilisi üstidin tekshürüsh élip bériwatqanliqini, eger toluqlima yardem puli bériwatqanliqi bayqalsa, xitay tawarlirigha tedbir qollinidighanliqini bildürdi.

Amérika dölet mejlisining bir komitéti yéqinda xitayni xelq pulining qimmitini tengsheshke qistaydighan bir qanun layihisi maqullighan. (Erkin)