Amérika bilen xitay xelq pulining qimmitini tengshesh mesilisini muzakire qilidu


2005-05-06
Share

Amérika maliye ministirliqidiki da'irilerning ashkarilishiche, amérika bilen xitay xelq pulining qimmitini tengshesh mesilisi boyiche aldimizdiki hepte washin'gtonda söhbet bashlaydiken.

Amérika maliye ministirliqining bayanatchisi, xitay - amérika pul - mu'amile wekillirining muzakire témisi iqtisadi mesililer , pul - mu'amile we xelq pulining tennerqini östürüsh mesilisige chétilidighanliqini élan qildi.

Xitay hökümiti xelq pulining tennerqini östürüsh toghrisidiki bésimgha duch kelmekte. Istanbulda chaqirilghan asiya tereqqiyat bankisining yighini, xitay pulining qimmitini pilandikidin erzan, dep körsetken. Bu yil 4 - ayda " sana'etleshken 7 dölet" ning maliye ministirlar yighini, xelq pulining qimmitini östürüshni telep qildi.

Amérika maliye ministiri jon snow, xelq pulining qimmitini östürüsh mesilide "xitayning heriket qollinish zamani keldi," dep körsetti. Emma xitay hökümiti xelq puli islahatining shert - shara'it hazirlan'ghanda élip bérilidighanliqini bildürmekte. Xitayning mu'awin maliye ministiri li yongning bildürüshiche, xelq puli islahatining waqit jedwili hazirche téxi tüzülmigen.

Xelq'ara metbu'atlar, bu yil 9 - we 10 - aylarda xelq puli qimmitining özgüridighanliqini perez qilishmaqta idi. Emma li yong, kishilerni sewrchan bolushqa chaqirdi. Hazir bir dollar xelq puligha 8 som 20 tiyin etrapida almashturulidu. Emma amérika qatarliq döletler bir dollarning 5 - 6 som etrapida almashturulushini bazardiki qimmitige muwapiq, dep qarimaqtiken. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet