Америка хитайниң хәлқ пулиниң қиммитини өстүрүшини йәнә тәләп қилди

Америка федерал запас фонди комитетиниң рәиси алән гренспан, сәйшәнбә күни хитай даирилирини хәлқ пулиниң қиммитини қоюветишкә үндиди. Әмма хитай хәлқ банкисиниң мудири җав шявчүән, хәлқ пулиниң қиммитини қоюветиш үчүн техиму көп вақитқа иһтияҗи барлиқини тәкитлигән.

Б б с ниң тәкитлишичә, гренспанниң сөзи америкиниң хәлқ пулини әркин қоюветиш тоғрисидики тәлипи шундақла бу йолдики бесими күчийиватқанлиқини көрситидикән. Америка хитай һөкүмитини хәлқ пулиниң базардики қиммитини төвәнлитиш усули билән хитай маллириниң експорт миқдарини көпәйтип, адаләтсиз риқабәткә йол ачмақта, дәп әйиблигән.

Гренспан юқириқи сөзләрни бейҗиңда чақирилған пул сиясити тоғрисидики хәлқара йиғинда телевизор арқилиқ сөзлигән. Гренспанниң тәкитлишичә, хәлқ пулини әркин қоюветиш хитай иқтисадиға пайдилиқкән. У, "мениңчә хитай мувапиқ бир вақитни тепип тәдбир қоллиниши керәк," дәп көрсәтти. Әмма җав шявчүән, хәлқ пулиниң қиммитидики өзгүрүшниң җоңго иқтисадиға көрситидиған тәсирини чоңқур анализ қилишимизға тоғра келиду, дәп тәкитлигән. У, хәлқ пулиниң қиммитини өзгәртиш тоғрисидики хәлқара бесимлар иқтисади тәләпни әмәс, сияси иһтияҗни асас қилған, дәп көрсәткән. (Әркин)