Amérika maliye ministiri sinow xitayni xelq pulining qimmitini östürüshke ündeydu

Amérika maliye ministiri jon sinow, düshenbe küni yaponiyige yétip kélip, xitayni öz ichige alghan sherqiy asiya elliridiki ziyaritini bashlidi. Jon sinow yaponiyidiki ziyaritidin kéyin xitayning shangxey, chéngdu, we béyjing qatarliq sheherlirini ziyaret qilidu.

Jon sinow, asiyadiki sepirini bashlash aldida jüme küni xitayni yene bir qétim xelq pulining qimmitini östürüshke chaqirdi.

Xelq pulining qimmiti xitayning bu yil 6 - ayda xelq puli qimmitini az miqtarda östürgenlikini hésabqa almighanda, amérika - xitay otturisidiki soda ixtilapining menbe'esi hésablinidu.

Amérika xitayni xelq pulining qimmitini chüshürüp, xitay towarlirining éksportini köpeytish, amérikining sodidiki qizil reqimini peyda qilish, amérikida ishsizlarning köpiyishini keltürüp chiqirish bilen eyiblimekte.

Amérika xitay bilen toqulma buyumlar éksport mesilisi boyiche 5 qétim söhbet élip barghan bolsimu, emma kélishim hasil qilalmidi.

Jon sinow, xitayning xelq puli qimmitini az miqtarda östürüsh herikitini "muhim bir qedem," dep tekitligen bolsimu, emma xitayning bu yolda ilgirligen qedemler bésishigha toghra kélidighanliqini eskertmekte. Jon sinow "xelq pulining öz qimmitini bazar arqilq tengsheshke yol qoyush kérek," deydu.

Jon sinow, béyjingda 20 dölet guruhining maliye we merkizi banka bashliqlar yighinigha qatnishidiken. (Erkin)