Amérika palata ezaliri xitaygha xelq puli qimmitini tengshesh heqqide bésim ishletti

Amérika dölet mejlisi ezaliridin charliz shumér we lindséy grehemler düshenbe küni xitaydiki ziyaritini bashlidi. Ular bu qétim xitay hökümitige, xelq pulining amérika dolliri bilen bolghan tégishish nisbitige tutqan siyasitini özgertish toghrisida bésim ishletmekchi hemde xitay eger bundaq qilmisa amérika xitaygha tégishlik iqtisadiy jaza qollanmaqchi.

Amérikining kéngesh palata ezasi charliz shumér we lindséy grehem, xitay hökümitining choqum xelq pulining qimmitige qayta baha bérishi kéreklikini, bolmisa amérika dölet mejlisining 31‏- mart küni xitay mallirigha jaza süpitide 5%.27 Tamozhna béji qoyush üchün bélet tashlash pa'aliyiti élip baridighanliqini bildürdi.

Charliz shumér bu qétimqi sepiride béyjing, shangxey we xongkongni ziyaret qilip, xitayning yuqiri derijilik emeldarliri bilen söhbetlishidighanliqini bildürdi. Uning éytishiche, ular pul mesilisidin bashqa yene, xitayning soda siyasiti we eqliy mülük hoquqi mesililiridimu muzakirilishidiken.

Amérika hökümiti xélidin béri xitayning xelq pulining qimmitini qesten töwen tutiwélish arqiliq xitay mallirini xelq'ara bazarda barawersiz halda üstünlükke érishtürüwatqanliqini eyiblep kelgen idi. Nöwette amérikining bu heqtiki tenqidi barghanséri kücheymekte. (Peride)