Һиндистанда кәң көләмлик намайиш болди

Һиндистандики кәмбәғәл деһқанларниң 30 күн пиядә йол меңип, һөкүмәттин йәр тәқсим қилип бериш вә йәр ислаһат елип беришни тәләп қилип уюштурған намайишиға қатнашқанларниң сани үзлүксиз көпийип, намайишчилар йәкшәнбә күни пайтәхт йеңи деһлиға йетип келип топланғанда уларниң сани 25 миңдин ашқан.

Ройтерс агентлиқиниң учурлириға асасланғанда, намайишчилар 325 километир йолни пиядә басқан болуп, намайишчилар һиндистан баш министири билән көрүшүшни тәләп қилған.

Намайишчилар һөкүмәтниң бир йәр ислаһати комитети қуруп, йәр ислаһатини қәтий елип беришни, узундин буян һәл болмай келиватқан йәр делосини бир тәрәп қилишни тәләп қилған. Шуниң билән бир вақитта йәнә деһқанларниң йәр мәсилиси, кәмбәғәлчилик вә башқа мәсилилиридин пайдиланған мавчилар дәп аталған коммунистлар қораллиқ гуруппиларни тәшкилләп һөкүмәт әскәрлири билән көп қетим тоқунушқан иди. Мавчиларму йәр ислаһати мәсилисини көтүрүп чиқип, кәмбәғәл деһқанларни қолиға қорал елип һөкүмәткә қарши турушқа күшкүрткән болсиму, бирақ кәң қоллашқа еришәлмигән икән.

25 Миң кишилик намайишчиларниң рәһбәрлири һиндистандики һакимийәт бешидики партийә рәһбири суния гәнди билән көрүшкән, улар 2-өктәбир күни һиндистан мустәқиллиқ күни йәни сабиқ һиндистан рәһбири гәндиниң туғулған күни йеңи деһлида чоң көләмдә намайиш характерлиқ хатириләш елип баридикән. (Үмидвар)