Amérika xitayni afriqida "ijabiy rol" oynashqa chaqirdi

Xitay - afriqa munbirining yighini béyjingda échiliwatqan bir chaghda amérika xitayni afriqining tereqqiyatida " ijabiy rol" oynashqa chaqirdi. Amérika tashqiy ishlarministirliqi bayanatchisi sén mekkormak, " biz xitayning afriqa iqtisadi-siyasiy tereqqiyatida ijabiy rol oynishini soraymiz " dep körsetti.

Xitay mu'awin bash ministiri wu yiy, xitay - afriqa munbirini yéngi esirdiki riqabetke qarshi qurulghan zor istratégiyilik tedbir,dep tekitligen.Lékin xitayning néfit - kan bayliqi, afriqa bazirini igilesh pilani talash - tartish qozghimaqta. Kishilik hoquqini közitish teshkilati xitayni néfit üchün zimbabuwi we sudanlarning kishilik hoquq depsendichilikige köz yummaqta , dep eyiblidi.

Dunya bankisi xitayning qerz puli afriqida xiyanetchilikni we afriqa döletlirining qerzini téximu éghirlashturuwétidu, dep agahlandurmaqta. Afriqidiki ishchilar uyushmiliri xitay shirketlirining afriqa ishchilirigha tutqan mu'amilisini we xitay mallirining afriqa bazirini igiliwalghanliqini eyibligen.

Lékin xitay tashqiy ishlarministirliqi bayanatchisi lyu jyenchaw béyjingning afriqa siyasitini aqlap," bizning prinsipimiz ‏- siyasiy séstimimiz, tereqqiyat yolimiz, qimmet qarishimiz we idi'ologiyimizni bashqilargha téngish emes " deydu. Kishilik hoquqni közitish teshkilati xitayni sudanning néfitini dep " darfurda yüz bériwatqan qirghinchiliqqa süküt qilmasliqqa" chaqirdi. Bu qétimqi yighinda xitay afriqa döletliri bilen bir qatar kélishimler imzalidi. (Erkin)