Франсийә хитайни африқидики тоқунуш болуватқан дөләтләрни қорал - ярақлар билән тәминлимәктә, дәп әйиблиди

Франсийә дөләт мудапиә министири мишел алиот мареий, хитайни африқидики тоқунуш болуватқан дөләтләргә наһайити көп миқдарда қорал - ярақ сетип, қорал - ярақ имбаргосиға бузғунчилиқ қилди, дәп әйиблиди.

Мишел аллиот мареий алдинқи күни франсийә парламентиниң кеңәш палатасида " хитай африқа қуруқлуқида актип паалийәт қиливатқан дөләтләрниң бири "дәп тәриплиди. У, " шуниң үчүн биз буниңға диққәт қилишимиз керәк, йәни биз қорал - ярақ имбаргоси қойған дөләтләрдә даим хитайниң қорал - ярақлирини учритиватимиз " дәп тәкитлигән.

Мареийниң әскәртишичә, чад вә оттура африқа җумһурийәтлиригә әвәтилгән франсийә әскәрлири бу дөләтләрдики қораллиқ унсурларниң қолида хитай қораллирини байқиған. Чад билән оттура африқа җумһурийити франсийиниң кона мустәмликиси болуп, бу 2 дөләт суданни мәзкур дөләтләрдики топилаңчиларни қоллаш билән әйиблимәктә иди.

Судан болса хитайниң африқидики әң йеқин шерики. Хитай судан нефит санаитигә көпләп мәбләғ салмақта. Бу йил 6 - айда хәлқара кәчүрүм тәшкилати хитайни суданға көпләп қорал - ярақ сетиш билән әйиблигән.

Лекин хитай даирилири франсийә дөләт мудапиә министириниң сөзини " хитай - африқа мунасвитигә қилинған " иғвагәрчилик" дәп әйиблиди. Хитай ташқий ишларминистирлиқи баянатчиси чин гаң "җуңго - африқа мунасивитигә иғвагәрчилик қилидиған һәр қандақ сөз ‏- һәрикәтләр хәлқниң қарши елишиға еришмәйду " дәп көрсәтти. (Әркин)