Xitay afriqidiki zambiye bilen 800 milyon dollarliq meblegh sélish kélishimi imzalidi

Xitay dölet re'isi xu jintawning afriqigha qaratqan istratégiyilik ziyariti jeryanida xitay afriqa döletliri bilen bir qatar soda-iqtisadiy kélishimlerni imzalighan bolup, xitay axbarat wastilirining ashkarilishiche, xu jintaw shenbe küni zambiye sepiride mazkur afriqa dölitining prézidénti muwanawa bilen bir qatar iqtisadiy kélishimlerni imzalidi.

B b s agéntliqining uchur bérishiche, xu jintaw zambiyige 800 milyon dollarni meblegh süpitide qerz bérishke qoshulghan shuning bilen bir waqitta yene zambiyining xitaygha qayturushqa tégishlik 800 milyon dollar qerzini kechürüm qiliwétishke wede bergen.

Kélishim boyiche xitay zambiyide mis kani qéshishqa meblegh selishqa, zambiyining shimalida xitay shirkitining bir iqtisadiy alahide rayoni qurushqa pütüshülgen.

Lékin, xu jintawning zambiye ziyariti qarshiliqlargha duch kelgen bolup, b b s agéntliqining uchuridin qarighanda, zambiyidiki "wetenperwerler birlik sépi "dep atalghan bir teshkilat xitayni " zambiyining bayliqlirini qolgha keltürüshke urunush we iqtisadiy mustemlikichilik" bilen tenqid qilghan.

2005-Yili zambiyidiki xitay igidarchiliqidiki bir mis kan ishchiliri namayishi ötküzüp, xitay xojayinlarning ishchilarni ezgenlikige naraziliq bildürgen. Mezkur teshkilat yene xitaylarni qoghlap chiqirip, teywen bilen munasiwet ornitishni teshebbus qilghan.

Zambiye dunya boyiche mis eng köp chiqidighan dölet bolup, shu sewebtin xitay zambiye bilen bolghan hemkarliqni kücheytishke ehmiyet bergen iken. (Ümidwar)