Xelq'ara teshkilatlar xitayning afriqida yürgüzüwatqan siyasitini qattiq tenqidlidi

Xelq ichidiki we shundaqla xelq'aradiki köpligen muhitni qoghdash teshkilatliri xitayning afriqigha qollan'ghan siyasitige naraziliq bildürüp, xitay hökümitini qattiq tenqidlimekte hemde xelq'ara jem'iyetni xitayning afriqida öz menpe'etini közde tutup, mezkur jayning muhitigha zor buzghunchiliq qiliwatqanliqigha diqqet qilishqa chaqirdi.

Merkizi amérika kaliforniye shtatidiki xelq'ara derya ‏-éqin ishlirigha mes'ul teshkilat düshenbe küni bayanat élan qilip, xitayning sudanda su ambiri qurmaqchi boluwatqanliqigha qarshi ikenlikini bildürdi. Mezkur teshkilatning bildürüshiche, xitayning su ambiri qurush pilani tüpeylidin, mezkur jaydiki 70 mingdin artuq xelq qumluqqa qarap yütkilishke mejbur bolghan. Qarshi chiqquchilar sudan hökümiti teripidin quralliq basturulghan.

Xelq'ara derya ‏-éqin ishlirigha mes'ul teshkilatning ijra'iye re'isi pechük maykél ependi " xitay hökümiti hazir bir qisim gherb döletlirining 50 ‏-, 60 ‏- we 70 ‏- yillarda qilghan qilmishlirini tekrarlimaqta. Démek ular hazir afriqigha nurghun meblegh ekirish arqiliq, mezkur jayning tebi'iy bayliq menbesige ige bolmaqchi, lékin ademni échinduridighini, ular hazir öz menpe'eti üchün, mezkur jayda nurghunlighan asasiy qurulushlarni köpeytishke bashlidi.

Bundaq qilish mezkur jayning ékologiyilik muhitini weyran qilipla qalmay,xelqning menpe'etigimu zor ziyan élip keldi" dep bildürdi. U sözide yene " eger xitay shirketliri özlirining afriqidiki bu xil qilmishlirini toxtatmaydiken, uzun ötmey, xelqning naraziliqi we öchmenliki tüpeyli, xitayning obrazimu pütünley yoq bolidu" dep körsetti. (Méhriban)