Һиндистан- америка мунасивәтлириниң күнсери тәрәққи қилиши хитайни биарам қилмақта


2007.06.12

Һиндистан- америка мунасивәтлириниң тәрәққиятидин биарам болуватқан хитай һөкүмитиниң, һиндистан билән болған чегра мәсилисидики позитсийиси барғансири қопаллишишқа йүзләнмәктә.

Әнглийидә чиқидиған пул-муамилә гезитиниң хәвәр қилишичә, гәрчә хитай билән һиндистан оттурисидики иқтисадий мунасивәтләр тез тәрәққий қиливатқан болуп, бу икки дөләт, санаәтләшкән сәккиз дөләт башлиқлириниң алий дәриҗилик йиғини җәрянида, дуня килиматидики өзгириш мәслисидә охшаш мәйданда турған болсиму, әмма йеқиндин бери бейҗиң билән йеңи деһли оттурисидики сиясий мунасивәтләр йирикләшмәктә.

Хәвәрдә ейтилишичә, хитай һөкүмитиниң йеқинда, һиндистан билән чегра ихтилапини бир тәрәп қилиш тоғрисида икки дөләт оттурисида елип берилған сөһбәтләрдә оттуриға қойған тәләплири, һиндистан вәкиллирини һәйран қалдурған. Хәвәрләргә қариғанда, хитай һөкүмитиниң оттуриға қойған тәләплири, чегра мәсилисини бир тәрәп қилиш үчүн 2005‏- йили икки дөләт тәрипидин имзаланған келишимгә пүтүнләй хилап икән.

Хәвәрләргә қариғанда, сөһбәт җәрянида хитай тәрәп, һиндистанниң аруначал прадеш штатиниң хитайға тәвә икәнликини илгири сүргән.

Хитай һөкүмитиниң өткән ай хитайни зиярәт қилмақчи болған 107 кишилик һиндистан вәкилләр өмикиниң бир әзасиға виза беришни рәт қилғанлиқи, икки дөләт мунасивәтлирини техиму хунүкләштүргән.

Сиясий анализчилар, хитай һөкүмитиниң оттуриға қойған тәләплиригә, бейҗиң һөкүмитиниң, америка-һиндистан мунасивәтлириниң тәрәққиятидин ғәзәпләнгәнликиниң очуқ- ипадиси дәп, тәбир бәрмәктә . (Өмәр қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.