Amérika diniy erkinlik komitéti xitayni eyiblidi

Amérika xelq'ara diniy erkinlik komitéti, xitay hökümitining buddist lamalarni hemde katolik chérkawining poplirini teynlesh toghrisida chiqarghan yéngi belgilimilirini qattiq eyiblidi.

Amérika xelq'ara diniy erkinlik komitéti teripidin bu munasiwet bilen jüme küni élan qilin'ghan bir bayanatta, xitay hökümiti teripidin chiqirilghan yéngi belgilimilerning tibetning diniy dahisi dalay lamaning tesirini yoqutushni meqset qilghanliqi eskertilgen.

Xitay hökümitining yéngi belgilimiside, herqaysi diniy mertibilerge teynlinidighan tibet lamalirining , döletni pütünlükini qoghdash prinsipige hörmet qilishi kérekliki tekitlen'gen bolup, belgilimide chet'ellerde pa'aliyet élip bériwatqan herqandaq teshkilat we shexslerning döletning lamalarni teynlesh ishlrigha arilishishi cheklen'gen.

Bezi siyasiy mulahizichilerning éytishiche, xitay hökümitining yingi belgilimisi, dalay lamaning bundin kéyin , tibetning diniy rehberlirini teyinlesh mesilisige arilishishining aldini élishni hemde dalay lamaning ölümidin kéyin, nöwette dalay lamaning rhberlikide hindistanda pa'aliyet élip bériwatqan tibet diniy erbablirining yéngi dalay lamaning teyinlinishide rol oynishigha ruxset bermeslikni, meqset qilidiken.

Dalay lama 1995‏- yili tibet buddizimida dalay lamadin kéyin, eng chong chong diniy maqam bolghan penchen lamaliq maqamigha 6 yashtiki gendon néyimani teyinligen idi. Lékin dalay lama néyimani penchen lamaliq maqamigha teyinligendin kéyin, uzun ötmey néyima we uning a'ilisi iz-direksiz yuq bolup ketti.

Giyaltsan norbuni 11‏- penchen lama qilip teyinligen xitay hökümiti, néyima we a'ilisining yoshurun bir jayda döletning qoghdishi astida yashawatqanliqini bildürmekte. (Ömer qanat)