Amérika générali xitay herbiy qorallirining özini qoghdash iqtidaridin éship ketkenlikini bildürdi

28 - Yanwar düshenbe küni, amérika générali kiting xitay herbiy qoral ‏- yaraq iqtidarining xitay hökümiti tekitlep kéliwatqan "özini qoghdash" derijisidin éship ketkenlikini otturigha qoydi.

Yéqinda xitayda ziyarette bolup qaytqan amérika asiya-tinch okyan herbiy qomandanliq shtabining bash qomandani adémiral timotiy kiting, özining xitay rehberliri otturigha qoyghan atalmish "öz térritoriyisini qoghdash" iqtidaridin éship kétidighanliqini bildürüp: bizni bi'aram qilghini ular otturigha qoyghan "özini qoghdash" qa ishlitidighan qorallarning iqtidari bizning mölcherimizdikidin köp halqip ketken dégen.

Kéting bu sözlerni tünügün washin'gtonda échilghan asiya tetqiqat jem'iyiti muhakime yighinda otturigha qoyghan.

U yene,xitayda tehdit xaraktérlik qorallarning barliqi heqqide toxtilip"men biz burun tekitligen nuqtilarni qayta tekrarlisam, biz xitayning némige urunuwatqanliqini yaki ularning ochuq ‏- ashkara bolmaywatqanliqini we yaki bundaq qoral -yaraqlarning mewjut ikenliki heqqidiki pakitlarni bilipla qalmay, belki biz xitayda shundaq qorallarning barliqini bilimiz" dédi.

U yéqindila xitaygha qaritilghan ikkinchi qétimliq herbiy ziyaritini ayaghlashturghan bolup, u bu qétimliq muhakime yighinida yene, amérikining xitay bilen herbiy di'aloglarni ilgiri sürüsh kéreklikini otturigha qoyup, amérika- xitay arisida xata chüshinish hetta toqunush keltürüp chiqirsh mumkinchiliki bolghan ehwallarning aldini alidighan chare tépish kéreklikini tekitligen.

Ötken yili yanwarda xitay herbiy da'iriliri orbitidiki kardin chiqqan bir sün'iy hemrahini bashqurulidighan bomba bilen étip chüshürgendin kéyin, pütün xelq'ara miqyasida küchlük qarshi inkaslarni meydan'gha keltürgen.

Shundin kiyin amérika da'iriliri, eger teywen boghuzida toqunush kélip chiqsa xitayning oxshash téxnikidin paydilinip amérika sün'iy hemrahigha tehdit sélishidin ensireydighanliqini bildürgen idi. (Jüme)