Amérika - xitay iqtisadiy istratégiye söhbiti axirlashti

Amérika bilen xitay arisida ötküzülüwatqan 3-qétimliq iqtisadiy istratégiye söhbiti 13 - dékabir küni béyjingda axirlashti. Söhbetni amérika tereptin maliye ministiri pawlson xitay tereptin mu'awin bash ministiri wuyi élip bardi.

B b s agéntliqining xewirige asaslan'ghanda, söhbet axirlashqandin kéyin, pawlson bilen wu yi muxbirlarni kütüwélish yighini ötküzüp, ikki dölet iqtisadiy munasiwetliri heqqidiki söhbetning xulasisi heqqide yekün chiqirip, "nahayiti muweppeqiyetlik" bolghanliqini tekitleshti.

Lékin, amérika bilen xitay arisidiki iqtisadiy istratégiye söhbitide yenila köpligen mesililerning hel bolmighanliqi körsitilmekte. Mesilen, xitay terepning amérikining xitay xelq pulining almashturush qimmitini tengshesh süritini tézlitish telipige qoshulghan bolsimu, biraq éniq sanini éytmighan.

Bu qétim xitay, chet el shirketlirining xitay teweside xelq pulini ishlitip zayom élish we pay chéki élishigha qoshulghan. Chet el shirketlirining hazir xitaygha salghan meblighini 100 milyard dollardin 300 milyard dollargha yetküzüshke qoshulghan hemde amérika bilen bolghan énérgiye we ékologiye mesililiri boyiche hemkarliqni téximu kücheytishke qoshulghan.

Bildürüshlerge qarighanda, amérika terep xitayning balilar oyunchuqi, yémek-ichmek we bir qisim toqumchiliq mehsulatliri qatarliqlarning süpet ölchimige qattiq chek qoyghan bolup, bu ehwal yawropa döletliridimu körülgen idi. (Ümidwar)