Қанун чиқарғучилар америка - хитай иқтисади сөһбитиниң нәтиҗисигә тәнқиди позитсийә тутти


2007.05.25

Гәрчә буш һөкүмити бу һәптә вашингтонда өткүзүлгән америка-хитай истиратегийилик иқтисад сөһбитидә илгириләш болғанлиқини вә сөһбәтни иҗабий баһалиған болсиму, лекин бу сөһбәт америка дөләт мәҗлисиниң хитай билән болған содиға тутқан тәнқиди позитсийисини өзгәртәлмиди.

Америка дөләт мәҗлиси кеңәш палатасиниң көп санлиқлар рәһбири харрий рейд, пәйшәнбә күни хитай иқтисади вәкилләр өмикиниң башлиқи, муавин баш министир ву йи билән көрүшкәндин кейин, дөләт мәҗлисидә техиму көп әзаларниң, әгәр хитай билән буш һөкүмити хитай - америка содисидики тәңпуңсизлиқни өзгәртишкә тәдбир қолланмиса, дөләт мәҗлиси һәрикәт қоллиниши керәк, дәп қараватқанлиқини билдүрди.

Бу қетимқи сөһбәттә хитай - америка һава йоллири қатнишини кеңәйтиш қатарлиқ бир қатар мәсилиләрдә келишим һасил қилған болсиму, лекин хитай вәкилләр өмики хәлқ пулиниң қиммитини өстүрүшкә қошулмиди. Хитай тәрәп хәлқ пулиниң қиммитини өстүрүштә техиму көп вақитқа еһтияҗи барлиқини билдүрмәктә.

Лекин авам палата хам чот комитетиниң рәиси чарлиз рангел, мәзкур комитетниң хитай маллириға импорт чәклимиси қоюш қанун лаһийиси түзүшкә тәйярлиниватқанлиқини билдүргән.

Кеңәш палата әзаси чарлиз шумир, хитай тәрәп содидики тәңпуңсизлиқни тәңшәш йолида һечқандақ һәрикәт қолланмиди, дәп әйиплиди вә қуруқ вәдиләр америка дөләт мәҗлисни әндишидин хали қилалмайдиғанлиқини билдүрди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.