Amérika we yawropa ittipaqi xitay ustidin dunya soda teshkilatigha erz sundi

3- Mart düshenbe küni amérika hökümiti we yawropa ittipaqi xitayning pul-mu'amile sahesidiki uchur-informatsiyelerni qattiq tizginlep xitaygha soda uchuri satidighan chet'el shirketlirining soda ishlirigha paydisiz muhit shekillendürgenliki üchün xitay ustidin dunya soda teshkilatigha erz sundi.

B b s ning körsitishiche, yawropa ittipaqi soda komissari pétir mandélson bayanat élan qilip, riqabet küchige ige, erkin pul mu'amile sahesining, pul-mu'amile bazirining hayati küchini urghutidighan négizlik menbe ikenlikini, emma xitay hökümitining bu sahediki cheklesh siyasiti chet'ellik uchur teminligüchi shirketlerning menpe'etige ziyan salghanliqini otturigha qoydi.

Melum bolushiche, 18 ayning aldida xitay pul- mu'amile sahesidiki uchurgha a'it élan qilin'ghan belgilime, royétirs, dow jonés shirkiti we blumbérg qatarliq xitaydiki banka, hökümet organliri we bashqa xéridarlargha iqtisadi uchur satidighan shirketlerning menpe'etige muxalip iken.

Xitayning bundaq cheklesh xaraktéridiki belgilimini békitip chiqishi amérika we bashqa chet'ellik pul- mu'amile uchurlirini teminleydighan shirketlerni intayin passip we paydisiz orun'gha chüshürüp qoyghanliqini bildürgen amérika soda wekili susen shwab: " shunga biz mezkur mesilini xitayning aldigha nechche ret qoyghan bolsaqmu, bu téxi hazirghiche hel qilinmidi" dédi.

Melum bolushiche, xitay bilen dewager terepler: yawropa ittipaqi we amérika hökümiti arisida 60 künlük öz-ara kélishish möhliti bar bolup, eger söhbetliship hel qilish charisi netijisiz ayaghlashsa, bu mesile dunya soda teshkilatining resmiy tekshürüshige tapshurulidiken. (Jüme)