Хитай билән америка кишилик һоқуқ сөһбитини қайтидин әслигә кәлтүрмәкчи


2008-02-26
Share

Әнгилийә б б с радио ‏- телевизийисиниң хәвиридә көрситишичә, йеқинқи күнләрдә бейҗиңда зиярәттә болуватқан америка ташқи ишлар министири кандилиза райис билән хитай ташқи ишлар министири яң җиечи көрүшүш җәрянида,америка билән хитай арисида төт йилдин буян үзүлүп қалған кишилик һоқуқ сөһбитини әслигә кәлтүрүш һәққидә сөһбәттә болған. Хитай билән америка 1990- йилидин башлап кишилик һоқуқ сөһбитини қәрәлсиз елип беришқа пүтүшкән иди.

Әмма җорҗ буш һөкүмитиниң 2002 - йили бирләшкән дөләтләр тәшкилати кишилик һоқуқ тәкшүрүш гурупписини хитайға киргүзүлмигәнлики сәвәблик хитайни әйиблиши билән, икки дөләт оттурисидики сөһбәттә ихтилап пәйда болған вә хитай 2004 - йили америка билән кишилик һоқуқ сөһбитини үзди.

Б б с ниң хәвиридә тәкитлишичә, гәрчә кандилиза райисниң бу қетим бейҗиңдики икки күнлүк зиярити, шималий корийә ядро мәсилисидә, алтә тәрәп сөһбитидә муһим орун тутуватқан хитайни шималий корийигә бесим ишлитишкә дәвәт қилишни мәқсәт қилған болсиму, әмма у яң җиечи билән сөһбәт җәрянида америкиниң тәйвәнниң бирләшкән дөләтләр тәшкилатиға киришини қоллимаслиқ мәйданини қайта тәкитлигән.

Кишилик һоқуқ тәшкилатлири, буш һөкүмитини хитайниң кишилик һоқуққа хилап һәрикәтлиригә қарита, җиддий тәнқидий позитсийә тутмай келиватқанлиқини шундақла бу арқилиқ өзиниң шималий корийә һәмдә иран мәсилилиридә вә террорчилиққа қарши һәрикәтлиридә хитайниң қоллишиға еришишни мәқсәт қиливатқанлиқини тәнқид қилип кәлмәктә. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт