Xitay bash ministiri darfur siyasitini aqlidi


2008.02.19
Share on WhatsApp
Share on WhatsApp

Nöwette xitayning olimpik ötküzüshige qarshi pikirler arisida xitay hökümitining sudan hökümitige yardem bériwatqanliqi küchlük qarshi pikir qozghawatqan mesilining biri.Shu seweblik xitay hökümiti nurghun dölet hemde ammiwi teshkilatlarning tenqidige uchrap kelmekte.

Xitay bash ministiri wén jyabawning 19 ‏- féwral seyshenbe, en'giliye bash weziri gordon brown bilen élip barghan söhbitide darfur mesilisi muhim téma qilin'ghan bolup, royétirs axbarat agéntliqining seyshenbe xewer bérishige qarighanda, wén jyabaw xitayning sudan siyasiti hemde darfur mesilisidiki rolini aqlap " junggo hökümiti sudanda tinchliq hem muqimliqning baldurraq ishqa éshishini ümid qilidu hem buning üchün yardemge muhtaj ellerge köp tereplime yardem yetküzüp kelmekte. Biz britaniye bilen üzlüksiz hemkarliship darfur mesilisini muwapiq hel qilishning usulini tépip chiqimiz " dégen hemde yéqinqi künlerde xitayning darfur mesilisidiki alahide wekili lyu güyjinni yene bir qétim béritaniye hemde sudan'gha mexsus ziyaretke ewetidighanliqini bildürgen.

Royétirs agéntliqi xewiride körsitilishiche, emeliyette xitay hökümitining darfur mesilisidiki meydani özgermigen bolup, xitay dawamliq türde sudandin néfit sétiwalmaqta hemde sudan hökümitini iqtisadi jehettin qollap yardemler bérip kelmekte. Sudanda hazirgha qeder ikki yüz ming adem qirghinchiliqqa uchrighandin bashqa, öy makanliridin ayrilghanlar ikki yérim milyon'gha yetken.

En'giliye bash weziri brown xitayning darfur mesiliside toghra yol tutushini tewsiye qilghan. Xitayning darfur mesiliside sudan hökümitini qollawatqanliqidek roli we xitayning kishilik hoquq xatirisi nöwette xitayning 2008 - yilliq olimpik ötküzüshige nisbeten eng küchlük qarshi pikirlerge seweb bolmaqta.

Yéqinda dangliq rézhissor sitiwén sipélbérgmu xitayning darfur mesilisige tutqan pozitsiyisi tüpeyli, bu qétim béyjing olimpikining bashlinish murasimi sen'et meslihetchilikidin istipa bergen idi. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.