Хейлуңҗяңда деһқанлар билән хитай сақчилар тоқунушти


2007-08-27
Share

Хитайниң хейлуңҗяң өлкисиниң йүтйән йезисидики деһқанлар билән хитай сақчилар оттурисида чиққан тоқунушларда аз дегәндә икки киши яриланған вә икки киши сақчилар тәрипидин қолға елинған.

Америка бирләшмә агентлиқиниң хәвәр қилишичә, йүтйән йезисидики деһқанлар шәнбә күни, мәзкур йезида йеңи тиҗарәт мәркизи қурушни пиланлиған бир қурулуш ширкитиниң, өйлири чеқилған деһқанларға бәргән төләм пулиниң азлиқиға наразилиқ билдүрүш үчүн йезиға киридиған йолларни тосувалған.

Хитай сақчилириниң йолни ечишқа урунуши деһқанлар билән сақчилар оттурисида тоқунуш кәлтүрүп чиқарған. Хоңкоңда чиқидиған җәнубий хитай сәһәр гезитиниң вәқә шаһитлириниң сөзлирини нәқил кәлтүрүшичә, тоқунушлар җәрянида бир киши өлгән.

Хитайдики чириклик, деһқанларниң йәрлириниң мусадирә қилиниши вә хитайда күнсери җиддийлишиватқан байлар вә намратлар оттурисидики пәрқ, хәлқиниң қаттиқ ғәзипини қозғаватқан болуп, бу вәқәләр сәвәбидин йеқинқи йиллардин бери хитайда хәлқ билән сақчилар оттурисида нурғун тоқунушлар келип чиқмақта.

Бу арида франисйә агентлиқиниң хәвәр қилишичә, 19 күнидин бири иш ташлаш һәрикити елип бериватқан хоңкоңдики төмүр завутиниң миңлиған ишчиси йәкшәнбә күни хоңкоң кочилирида намайиш өткүзди. Улар завут башқурғучилиридин ишчиларниң маашлирини көпәйтип беришини, хизмәт шараитини яхшилап беришини тәләп қилмақта. (Өмәр қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт